د دغه ولایت لپاره د طالبانو ویاند عصمتالله مرادي رسنیو ته ویلي، چې پرون جمعه د (غويي ۲۸مه) د بلچراغ، قیصار، پښتون کوټ، خیبر او المار ولسوالیو کې سېلابونه راوتلي دي.
هغه دا رنګه ویلي، چې په دغو ولسوالیو کې زرګونه کورونه، زرګونه جریبه کرنیزې ځمکې، ۱۵۰ دوکانونه او یو روغتیايي کلینیک هم ویجاړ شوی دی.
دغه طالب ویاند ویلي، چې شاوخوا ۳۰۰ څاروي هم له منځه تللي او خلکو ته یې بېشمېره زیانونه اړولي دي.
په دې وروستیو کې د افغانستان په بېلابېلو ولایتونو کې د مرګونو سېلابونو له امله خلکو ته درانه ځاني او مالي زیانونه اوښتي او خلک وایي، چې تر دې دمه یې نه طالبانو او نه مرستندویه بنسټونو هغه شان لاسنیوی کړی؛ لکه څنګه چې دوی یې تمه کوله.
خو له بل پلوه دغو سېلابونو ډېرو ولسوالیو او لرو پرتو سیمو ته غځېدلې لارې ګودرې هم ویجاړې کړې، چې ورسره د مرستو رسول هم ټکني شوي دي.
