د پاکستان پوځ رسنیزې څانګې په یوه خبرپاڼه کې ویلي چې د تېرې ورځې په عملیاتو کې یې د بلوچستان ژوب ضلعې په سمبازه سيمه کې ۲۹ وسله وال وژلي. پوځ په دغه بیان یو ځل بیا طالبان تورن کړي چې دغه وسله وال یې د افغانستان له خاورې را اړولي وو.
د پاکستان پوځ رسنیزې څانګې نن چهارشنبه د (غبرګولي دویمه) په یوه خبرپاڼه کې ویلي چې، تېره ورځ یې د دغه هیواد بلوچستان ایالت ژوب ضلعې په سمبازه سیمه کې د عملیاتو پر مهال ۲۹ وسله وال وژلي.
پاکستاني پوځ په دغې خبرپاڼه کې زیاته کړې چې د روانې مئ میاشتې په ۱۴مه نېټه یې له وسله والو سره په مخامخ جګړه کې د پوځ یو میجر وژل شوی.
د پاکستان پوځ په دغه بیان کې یو ځل بیا د طالبانو په حکومت غږ کړی چې وسله وال پرېنږدي چې د افغانستان له خاوري پاکستان ته واوړي او په دغه هیواد کې په امنیتي ځواکونو او ولسي خلکو بریدونه وکړي.
د پوځ خبرپاڼه وړاندې کاږي چې، پاکستان په پرله پسې ډول د طالبانو له حکومته غوښتي چې د ډیورنډ کرښې په اوږدو کې دې د ښه مدیریت ډاډ ورکړي. او په دې برخه کې دې خپل مسوولیت په بشپړ ډول ترسره کړي.
پاکستاني چارواکو تر دې وړاندې هم د طالبانو حکومت پړ بللی و، چې په خپله خاوره کې یې وسله والو ته پټنځي ورکړي او له هغه ځایه وسله وال په پاکستان کې بریدونه پلانوي.
طالبانو لا د پاکستان پوځ دغه بیان ته غبرګون نه دی ښودلی خو تر دې وړاندې د پاکستاني چارواکو دا ډول څرګندونې یې بې بنسټه بللې وې او ویلي و، چې په پاکستان کې نا امني د دغه هیواد خپله کورنۍ موضوع ده او حل کول یې هم د دغه هیواد د چارواکو مسوولیت دی.
