په افغانستان کې د حزب التحریر ډله وايي، طالبانو یې هرات کې «دعوت کوونکي» د ابوغریب او ګوانتانامو زندان په څېر «شکنجه کړي» دي. د دغه ګوند په خبرپاڼه کې ویل شوي، طالبانو یې ملګري داسې شکنجه کړي، چې د امریکا په زندانونو کې داسې څه نه کېدل.
دغه ګوند د سه شنبې په ورځ د (غبرګولي لومړۍ) په یوه خبرپاڼه کې لیکلي چې داسې ښکاري چې دا «ظالمانه» کړنې د طالبانو د ځینو استخباراتي کړیو له لوري د امریکايي زندانونو څخه په تقلید ترسره کیږي.دغه ګوند ویلي چې د دوی «دعوت کوونکي» د روان کال د غوايي په میاشت کې د «خلافت» او د «امت د یووالي» په تور نیول شوي او په زندانونو کې ځورول شوي دي.تر دې وړاندې حزب التحریر ډلې ویلي و، چې طالبان د دغه ګوند په کسانو پسې لټه کوي او چې پیدا یې کړي نیسي او بندیان کوي یې.طالبانو تر اوسه پورې د حزب التحریر دغه بیان ته غبرګون نه دی ښودلی، خو وړاندې تر دې یې ویلي و، چې په افغانستان کې به هر فعالیت یوازې د طالبانو له لوري کیږي او بل چاته په هیڅ ډول اجازه نه ورکول کیږي چې د دوی له چتر بهر فعالیت وکړي.د طالبانو په زندانونو کې د بندیانو ځورول او ربړول نوې خبره نه ده، تر دې وړاندې هم افغانستان انټرنشنل ته د څرخي پله او طالبانو د استخباراتو له زندانونو څخه د بندیانو خپلوانو د دوی د کورنیو پر غړو باندې د طالبانو له لوري د شکنجې او سختو سزاګانو راپورونه ورکړي وو.
