د طالبانو رییسالوزرا ملا محمد حسن اخوند په تازه حکم کې ویلي، چې د دغې ډلې د مالیې وزارت دې له سېل ځپلو سره د مرستې لپاره ډالري او افغاني حسابونه جوړ کړي. ملا حسن اخوند زیاتوي، د دغو حسابونو په جوړېدو سره به اړمنو کسانو ته په سمه توګه د مرستو د رسولو لپاره یو روڼ ادرس موجود وي.
د طالبانو چارو ادارې نن د ملا حسن دا حکم خپور کړی، چې پکې راغلي له سېل ځپلو سره د مرستې لپاره دا حسابونه باید د مالیې وزارت په سوداګریزو بانکونو کې جوړ شي او راټولې شوې مرستې دې په د افغانستان بانک کې وساتل شي.
د دې حکم له مخې راټولې شوې مرستې به د ریاست الوزرا د هدایت له مخې د يوې کمېټې له لارې د تدارکاتي، بودیجوي، تخصيصاتي او تادياتي مراحلو څخه پرته وکارول شي.
د طالبانو رییسالوزرا ملا محمد حسن اخوند په دغه حکم کې د هېواد له ملي او نړیوالو مرستندویه بنسټونو غوښتي، چې د زیانمنو کسانو د لاسنیوي لپاره د دې حسابونو له لارې مرستې وکړي.
پر افغانستان د طالبانو له واکمنۍ وروسته څو ځلې په هېواد کې لویې مرګونې طبیعي پېښې رامنځته شوې، چې د طالبانو ادارې د امکاناتو د نشتون له امله ورته سمه رسېدګي نه ده کړې.
په تېرو دوو کلونو کې په خوست، پکتیا او هرات ولایتونو کې زلزلې او د بغلان په ګډون په څو شمالي ولایتونو کې د وروستیو سېلابونو له امله زرګونو کسانو ته ځاني او مالي زیانونه واوښتل، خو تر اوسه ددې پېښو زیانمن د سرپناه له نشتون او لسګونو نور ستونزو سره مخ دي.
له دې سره، د خلکو له مرستو څخه د طالبانو ناوړه استفاده او د بهرنیو ادارو د مرستو په چارو کې ددې ډلې لاسوهنې هم نیوکې راپارولې دي.
څه موده مخکې د ملګرو ملتونو د ماشومانو وجهي صندوق په یوه راپور کې ویلي وو، چې د بشري مرستو په چارو کې د طالبانو لاسوهنه یو له هغو مهمو عواملو دی، چې د دوی د کارونو د بهیر د پڅېدو لامل شوی دی.
پر یونېسف سربېره د افغانستان د بیارغونې لپاره د امریکا ځانګړي څارونکي هم تر دې وړاندې د امریکا کانګرس ته په استماعیه غونډه کې ویلي و، چې د نړیوالو بشري مرستو اصلي برخه د طالبانو له خوا تالا کېږي.
طالبانو په ځلونو د دغې ډلې د ادارو له خوا د بشري مرستو د وېش په بهیر کې د لاسوهنې ادعا ناسمه بللې ده او وایي، چې د نړیوالو له خوا د بشري مرستو د وېش په بهیر کې طالبان لاسوهنه نه کوي، بلکې پرې څارنه کوي.
