د طالبانو د بهرنیو چارو وزارت مرستیال ویاند وايي، د دې ډلې د ریاست الوزرا اقتصادي مرستیال او د بهرنیو چارو وزیر امیر خان متقي په مشرۍ پلاوی تهران ته لاړ. ضیاء احمد تکل په خپل اېکس کې لیکلي، چې دغه طالب چارواکي به د ایران د ولسمشر ابراهیم رییسي د جنازې په مراسمو کې ګډون وکړي.
طالب پلاوي ایران ته رسېدو سره د ابراهیم رییسي جنازې ته دوعا وکړه.
ایران د ابراهیم رییسي او د هغه د ملګرو د جنازې لپاره ۳ ورځني مراسم جوړ کړي دي.
د ابراهیم رییسي او د هغه د ملګرو د تدفین رسمي مراسم د سه شنبې په ورځ په تبریز کې پیل شول او وروسته یې جسدونه تهران ته ولېږدول شول.
د ایران د حکومت مذهبي مشر سید علي خامنه يي نن د دوی د جنازې لمونځ په تهران پوهنتون کې وکړ.
په دغه مراسمو کې د ګډون په موخه د پاکستان، عراق او ارمنستان لومړي وزیران، د حماس د سیاسي دفتر مشر، د حزب الله سرمنشي مرستیال، د روسیې د استازو د جرګې مشر، د چین د لومړي وزیر مرستیال او یو شمېر نور چارواکي تهران ته رسېدلي دي.
د ایران د ولسمشر ابراهیم رییسي او د ورسره پلاوي چورلکه د یکشنبې په ورځ د ایران په ختیځ اذربایجان کې غورځېدلې وه، چې تر ۱۶ ساعتونو عملیاتو وروسته د دوی غورځېدلې چورلکه او مړي وموندل شول.
