د ایران د هلال احمر د نړیوالو چارو مرستیالې راضیه عالیشوندي د افغانستان سېل ځپلو ته د دغه هېواد د بشردوستانه مرستو د لومړنۍ جوپې د لېږلو خبر ورکړ. په بلخ کې د طالبانو د والي دفتر هم په مرستو بار د ایرانۍ الوتکې انځور خپور کړی دی.
د راپورونو له مخې، د ایران له لوري د افغانستان ورستیو سېلاب ځپلو کورنيو سره ۲۰ ټنه خوارکي او غير خوراکي توکو مرسته شوې ده.
دغه مرستې په داسې حال کې کیږي، چې د ایران د هلال احمر د نړیوالو چارو ادارې تر دې وړاندې ویلي و، چې د طالبانو د غوښتنې په صورت کې چمتو دي د افغانستان له سېل ځپلو سره مرستې وکړي.د راپورونو له مخې، د طالبانو د هلال احمر جمعیت سرپرست مطیع الحق خالص د یوه لیک په ترڅ کې له یادې ادارې زیانمنو ته ددې هېواد د مرستو غوښتنه کړې وه.ایران هم ژمنه کړې وه، چې د افغانستان د وروستیو سېلابونو زیانمنو ته به د خوراکي او غیر خوراکي توکو ترڅنګ په روغتیایي برخو کې هم مرستې وکړي.تر دې دوه ورځې وړاندې پېښو ته د رسېدو په چاروکو کې د طالبانو وزارت ویاند ویلي و، چې په تېرو نږدې لسو ورځو کې په افغانستان کې د سېلابونو له امله ۲۹۴ کسان مړه شوي دي.جانان سایق په یوې خبري ناسته کې زیاته کړې وه، چې د وروستیو سېلابونو له امله شاوخوا ۱۵ زره کورونه هم وېجاړ شوي دي.ښاغلي سایق ویلي، چې دغه زیانونه د غويي له ۲۰مې د غبرګولې تر لومړۍ نېټې پورې په بغلان، غور، تخار، فاریاب، بدخشان، سمنګان، بادغیس، بامیان او کاپیسا ولایتونو کې ځايي خلکو ته اوښتي دي.
دغه راز د طالبانو د کورنیو چارو وزارت ویاند هم په خپل اېکس کې لیکلي، چې د قطر د دولت وزیر او بهرنیو چارو مرستیال وزیر په مشرۍ پلاوي له سراج الدین حقاني سره په کتنه کې ویلي، چې د دواړو هېوادونو ترمنځ د دوه اړخیزو سیاسي او اقتصادي اړیکو پراختيا غواړي.
په دغه دوو جلا جلا کتنو کې دواړو طالب چارواکو په هېواد کې د وروستیو سېلابونو له زیانمنو سره د قطر د بیړنیو مرستو هرکلی هم کړی.
د قطر د بهرنیو چارو وزارت د مرستیال او د دغه هېواد د دولت د وزیر په مشرۍ پلاوی د دوحې غونډې په درشل کې کابل ته تللی دی.
دغه پلاوي نن له ملا عبدالغني برادر او عبدالسلام حنفي سره هم لیدلي دي.
که څه هم د طالبانو امنیتي او دفاعي چارواکو په خپلو اعلامیو کې د دوحې غونډې په هکله څه اشاره نه ده کړې، خو د طالبانو د ریاست الوزرا د اقتصادي مرستیال دفتر وايي، د قطر د بهرنیو چارو مرستیال وزیر له دې ډلې د دوحې دریمه غونډه کې د ګډون غوښتنه کړې ده.
د طالبانو د اعلامیې له مخې، د قطر د بهرنیو چارو مرستیال وزیر دا هم ویلي چې د طالبانو ګډون سره به دا غونډه یوه نتیجه ولري.
په مقابل کې ملا برادر ویلي، چې د دوحې غونډه د دوی له ګډون پرته نتیجه نه لري.
ټاکل شوې، چې د دوحې دریمه غونډه اوه ورځې وروسته د قطر پلازمېنه کې پیل شي.
ملګرو ملتونو ویلي دي، چې د دې غونډې موخه «له افغانستان سره په منظم ډول د نړیوالو اړیکو زیاتول دي.»
د قطر تر پلاوي مخکې د ملګرو ملتونو د سرمنشي مرستیالې روزمیري ډي کارلو کابل ته د سفر په ترڅ کې طالب چارواکو ته د دوحې غونډه کې د ګډون بلنه ورکړې ده.
د یادولو ده، چې طالبانو په دغه غونډه کې د ګډون په اړه څه نه دي ویلي، خو په تېره غونډه کې یې ګډون ونه کړ.
