د ازموینې په ملي اداره کې د طالبانو رییس په پنځو پړاوونو کې د کانکور د ازموینې د اخیستو خبر ورکړ. عبدالباقي حقاني نن په یوه خبري کنفرانس کې پرته له دې چې د کانکور د سږني کال په ازموینه کې د نجونو د حضور په اړه څه ووایي، اعلان وکړ چې دغه ازموینې به د غبرګولي په ۱۷مه نېټه پیل شي.
نوموړي په دې خبري کنفرانس کې دغه راز زیاته کړه، چې د ازموینې په لومړي پړاو کې شپاړس ولایتونه شامل دي او دا ازموینې به په دریو ورځو کې واخیستل شي.
د ښاغلي حقاني په خبره، د کانکور د ازموینې دویم پړاو د کابل او ولسوالیو لپاره دی، چې د چنګاښ په لومړۍ او دویمه نېټه اخیستل کیږي.د ازموینې په ملي اداره کې د طالبانو رییس وایي، چې د ازموینې په دریم پړاو کې بدخشان او د دې ولایت پنځه ولسوالۍ له مرکز څخه د لېرېوالي له امله شاملې دي.ویل کیږي چې په دې پړاو کې به لس نور ولایتونه هم دخیل وي.ښاغلی حقاني وايي، چې په څلورم پړاو کې اوه ولایتونه شامل دي او پنځم پړاو بیا د هغو کسانو لپاره دی چې په ازموینو کې غیر حاضر وي.د طالبانو د ازموینو ملي ادارې بیا د سږني کانکور د ګډونوالو د شمېر په اړه څه نه دي ویلي.دا دریم کال دی، چې طالبان د کانکور په ازموینه کې د نجونو د ګډون مخه نیسي.سره له دې چې دې ډلې د ډېر شمېر روزنیزو مرکزونو دروازې تړلي دي او د زدکړو پر بهیر یې ډېر بندیزونه لګولي، خو بیا هم عبدالباقي حقاني له کورنیو غواړي، چې خپل اولادونه په ازموینه کې د برخې اخیستو لپاره تشویق کړي.د طالبانو د ازموینو ملي ادارې د ۱۴۰۲ کال په چنګاښ میاشت کې اعلان وکړ، چې د کانکور په ازموینه کې یوازې نارینه برخه اخیستی شي.پر افغانستان د طالبانو له بیا واکمنېدو وروسته دغې ډلې له شپږم ټولګي پورته د نجونو ښوونځي وتړل او پوهنتونونو ته یې هم د نجونو د تګ مخه ونیوله.ددې ترڅنګ دغې ډلې په نادولتي ادارو کې ښځې له کار کولو منع کړې دي او د څه باندې پنځوسو فرمانونو په صادرولو سره یې پر ښځو پراخ بندیزونه لګولي دي.په تېرو نږدې درېیو کلونو کې نړیوالې ټولنې په ځلونو له طالبانو غوښتي، چې د نجونو ښوونځي بېرته پرانیزي او پر ښځو لګیدلي بندیزونه لرې کړي، خو دغه ډله وایي چې دا د دوی کورنۍ مسله ده او هیچا ته په خپلو چارو کې د لاسوهنې اجازه نه ورکوي.د ښځو پر وړاندې د طالبانو د محدودیتونو له امله د بشري حقونو سازمانونه وايي، چې دغې ډلې جنسیتي توپیر رامنځته کړی او ښځې یې له ټولنې ګوښه کړي دي.
