ایراني رسنیو راپور ورکړی، چې د لبنان حزب الله ډلې په ۲۰۱۸ کال کې له خپلې پوځي اډې د ابراهیم رییسي د کتنې انځورونه خپاره کړي دي. د دغو رسنیو د راپورونو له مخې، رییسي لېوالتیا درلوده چې د مقاومت لپاره هر کار وکړي.
د ایران خبري اژانسونه وایي، چې دا انځورونه د لبنان د حزب الله ډلې د هغې پوځي اډې دي، چې د لبنان په سویل کې الفتاح اقلیم په سیمه کې ده.
په سپاه پورې اړوند تسنیم خبري اژانس نن دا انځورونه بیا خپاره کړي دي.
د لبنان حزب الله ډله په بشپړه توګه د ایران تر ملاتړ لاندې ده.
ایراني رسنیو د العهد خبري اژانس له قوله لیکلي، چې ابراهیم رییسي په ۲۰۱۸ کال کې د قدس رضوي ولایت د سرپرست په توګه لبنان ته سفر وکړ او د حزب اللهان له عمومي منشي حسن نصرالله سره یې وکتل.
د راپورونو له مخې، په هغه وخت کې دواړو لورو له اسراییل سره د دایمي مبارزې او مقاومت د چارو په اړه خبرې وکړې.
د ایران د مخکیني ولسمشر ابراهیم رییسي او ورسره پلاوي چورلکه د غویي په ۳۰مه د ایران په ختیځ اذابایجان کې نسکوره شوه، چې تر ۱۶ ساعتونو عملیاتو وروسته د هغوی نسکوره شوې چورلکه او د دوی مړي وموندل شول.
د ابراهیم رییسي مړی نن په مشهد کې د امام رضا مزار کې خاورو وسپارل شو.
لانګ جورنال مجلې لیکلي، چې په افغانستان کې د بېلابېلو ډلو له خوا مقاومت د زیاتېدو په حال کې دی، خو تر اوسه د طالبانو د حکومت لپاره کوم ګواښ نه دی. دغې مجلې ویلي، چې د طالبانو د پرځولو یوازینی چانس د اختلافاتو پرېښودل او د یوه منظم سازمان جوړېدل دي.
ویل سلبر چې له څه باندې څلورو کلونو راهیسې د افغانستان او عراق له جګړو راپورونه جوړ کړي، دغه راز لیکلي دي چې سږکال به د طالبانو پر وړاندې بریدونه زیات شي.
له دې سره نوموړي ویلي چې مقاومت نوی پیل شوی او دا د طالبانو د حکومت لپاره ګواښ جوړېدلای نشي.
هغه په دې مطلب کې ویلي، چې د مقاومت ډلو یوازینی چانس دا دی چې د طالبانو د پرځولو لپاره مالي سرچینې او جنګي ځواک جذب کړي او د خپلمنځي اختلافاتو په پرېښودو سره یو ګډ سازمان جوړ کړي.
په دې راپور کې د مقاومت جبهې له ویاند علي میثم نظري، د افغانستان د ازادۍ جبهې له مشر یاسین ضیاء او د افغانستان د متحدې جبهې له مسوول سمیع سادات سره خبرې شوې دي.
داعش او نورې ترهګرې ډلې بیا د مقاومت پر وړاندې ګواښ بلل کیږي.
د دې مطلب لیکونکي د مقاومت ډلو د بریدونو د ارزښت په اړه لیکلي، چې د مقاومت جبهه د مبارزې دریم پړاو ته ننوځي او په پام کې لري، چې په ټول افغانستان کې خپل عملیات پراخ کړي.
له دې سره، په ۲۰۲۱ او ۲۰۲۲ کلونو کې په پنجشیر ولایت او یو شمېر شمالي سیمو کې د مقاومت جبهې د ناکام مقاومت په اړه ښاغلي نظري دې مجلې ته وویل، چې د جبهې تمرکز هدفمند او استراتیژیک بریدونه دي.
سلبر لیکلي، چې د مقاومت جبهې د ملاتړ مرکز د افغانستان په شمال کې ده، خو دا جبهه وایي چې د افغانستان په اړه د خپل ډیموکراتیک، غیرمتمرکز او څو اړخیز لید د تحقق لپاره پراخ ملاتړ ته اړتیا لري.
ښاغلي نظري ویلي، چې د پخوانیو امنیتي ادارو پر غړو سربېره په دې جبهه کې له پښتون، تاجک، هزاره او ازبک قومونو څخه کسان هم حضور لري.
سلبر زیاته کړې ده، چې د افغانستان د ازادۍ جبهه د مقاومت جبهې په څېر ستراتیژي لري او په ځينو مواردو کې له یو بل سره همکاري هم کوي.
یاسین ضیا دې مجلې ته ویلي، چې په تېرو کلونو کې د دې جبهې بریدونه زیات شوي دي.
د افغانستان د متحدې جبهې مسوول جنرال سمیع سادات لانګ وار جورنال ته ویلي، چې د دې جبهې موخه د افغانستان ازادي او د اساسي قانون پربنسټ د نظام جوړېدل دي.
دا جبهه چې نوې جوړه شوې ده، تراوسه یې د طالبانو پروړاندې د کوم وسله وال برید ادعا نه ده کړې او تمرکز یې سیاسي مبارزه ده.
د افغانستان د ژغورنې ملي مقاومت شورا هم د یوې داسې ډلې په توګه یادیږي، چې د طالبانو پر وړاندې د پوځي او سیاسي مقاومت غوښتونکې ده.
د لانګ وار جورنال مجلې لیکونکي ویلي؛ دې ته په کتو سره چې د دې شورا مشري هغه کسان کوي چې په تېر حکومت کې یې بریالي کارنامې نه درلودې، ستونزمنه ده چې د افغانستان د خلکو باور ترلاسه کړي.
په راپور کې د امرالله صالح په مشرۍ زرغون بهیر ته هم اشاره شوې ده، چې تر اوسه یې فعالیتونه پر عملیاتي اطلاعاتو متمرکز دی، چې په دې وروستیو کې د طالبانو د استخباراتو نومونه او په نوي پوځ کې یې د خیالي سرتیرو ستونزه افشا کړې ده.
په دې راپور کې د افغانستان د ازادۍ جبهه نوم هم اخیستل شوی چې په کندهار کې د فعالیت ادعا کوي.
د دې جبهې مشري په پیل کې عبدالمتین سلیمانخېل کوله او اوسمهال یې مشري د پخواني پوځ د قومنداذن ناصر وزیري له لوري کیږي.
جنرال وزیري لانګ وار جورنال ته ویلي، چې دې ډلې په ۲۰۲۲ کال کې خپل فعالیت پیل کړی دی او تمرکز یې تراوسه د اطلاعاتو د راټولولو په برخه کې و.
نوموړي وویل: «اوس مو خپل عملیات پیل کړي دي.»
د طالبانو د ریاست الوزرا اقتصادي مرستیال ملا برادر د قطر د بهرنیو چارو مرستیال وزیر سره لیدنه کې ویلي، د دوحې غونډه د دوی له ګډون پرته نتیجه نه لري. د قطر د دولت وزیر په مشرۍ پلاوي نن کابل ته په تللو د طالبانو د ریاست الوزرا له اداري مرستیال عبدالسلام حنفي سره هم لیدلي دي.
د عبدالسلام حنفي دفتر وايي، په دې لیدنه کې د قطر د بهرنیو چارو وزیر مرستیال هم و او د خپلمنځي اړیکو پر پراختیا خبرې وشوې.
د نوموړي د دفتر په اعلامیه کې د دوحې غونډې ته اشاره نه ده شوې، خو د طالبانو د ریاست الوزار د اقتصادي مرستیال دفتر په خپله اعلامیه کې دا غونډه هم یاده کړې ده.
د دې اعلامیې له مخې د قطر مرستیال بهرنیو چارو زویر له ملا بردار سره په لیدنه کې له دې ډلې غوښتي چې د دوحې غونډه کې ګډون وکړي.
محمد بن عبدالعزیز الخلیفي ویلي، قطر هیله من دی چې د طالبانو ګډون سره د دوحې راتلونکې غونډه کې نتیجه ترلاسه شي.
ملا برادر هم په ځواب کې ویلي، چې د طالبانو له ګډون پرته ورته غونډې نتیجه نه ور کوي.
نوموړي هیله ښودلې چې په دا ډول غونډو کې د طالبانو نظر او دریځ ته درناوی وشي: «د اسلامي امارت له استازي پرته د افغانستان په اړه نړیوالې جوړېدونکې غونډې کومې پایلې ته نشي رسېدلی نو پکار ده، چې په دې ډول غونډو کې د اسلامي امارت دریځ ته درناوی او خبره یې واورېدل شي.»
د دوحې دریمه غونډه اوه ورځې وروسته د قطر پلازمېنه کې پیلېږي.
ملګرو ملتونو ویلي دي، د دې غونډې هدف «له افغانستان سره په منظم ډول د نړیوالو اړیکو زیاتول دي.»
د قطر تر پلاوي مخکې د ملګرو ملتونو د سرمنشي مرستیالې روزمیري ډي کارلو کابل ته د سفر په ترڅ کې طالب چارواکو ته د دوحې غونډه کې د ګډون بلنه ورکړې ده
طالبانو په دغه غونډه کې د ګډون په هکله څه نه دي ویلي، خو په تېره غونډه کې یې ګډون ونه کړ.
طالبان په تېره غونډه کې د افغانستان لپاره د ملګرو ملتونو د ځانګړي استازي له ټاکلو سره مخالف و.
دوی وايي، یوناما په افغانستان کې شته او بل استازي ټاکلو ته اړتیا نشته.
له بلې خوا نن دد ملا کبیر په مشرۍ طالبانو سیاسي کمېسیون په یوه ناسته کې په دوحه کې د راتلونکې غونډې په اړه خبرې کوي.
نوموړي د دوحې په دریمه غونډه کې ګډون د دغې ډلې د «موقف» منلو سره مشروط بللی دی.
د ازموینې په ملي اداره کې د طالبانو رییس په پنځو پړاوونو کې د کانکور د ازموینې د اخیستو خبر ورکړ. عبدالباقي حقاني نن په یوه خبري کنفرانس کې پرته له دې چې د کانکور د سږني کال په ازموینه کې د نجونو د حضور په اړه څه ووایي، اعلان وکړ چې دغه ازموینې به د غبرګولي په ۱۷مه نېټه پیل شي.
نوموړي په دې خبري کنفرانس کې دغه راز زیاته کړه، چې د ازموینې په لومړي پړاو کې شپاړس ولایتونه شامل دي او دا ازموینې به په دریو ورځو کې واخیستل شي.
د ښاغلي حقاني په خبره، د کانکور د ازموینې دویم پړاو د کابل او ولسوالیو لپاره دی، چې د چنګاښ په لومړۍ او دویمه نېټه اخیستل کیږي.
د ازموینې په ملي اداره کې د طالبانو رییس وایي، چې د ازموینې په دریم پړاو کې بدخشان او د دې ولایت پنځه ولسوالۍ له مرکز څخه د لېرېوالي له امله شاملې دي.
ویل کیږي چې په دې پړاو کې به لس نور ولایتونه هم دخیل وي.
ښاغلی حقاني وايي، چې په څلورم پړاو کې اوه ولایتونه شامل دي او پنځم پړاو بیا د هغو کسانو لپاره دی چې په ازموینو کې غیر حاضر وي.
د طالبانو د ازموینو ملي ادارې بیا د سږني کانکور د ګډونوالو د شمېر په اړه څه نه دي ویلي.
دا دریم کال دی، چې طالبان د کانکور په ازموینه کې د نجونو د ګډون مخه نیسي.
سره له دې چې دې ډلې د ډېر شمېر روزنیزو مرکزونو دروازې تړلي دي او د زدکړو پر بهیر یې ډېر بندیزونه لګولي، خو بیا هم عبدالباقي حقاني له کورنیو غواړي، چې خپل اولادونه په ازموینه کې د برخې اخیستو لپاره تشویق کړي.
د طالبانو د ازموینو ملي ادارې د ۱۴۰۲ کال په چنګاښ میاشت کې اعلان وکړ، چې د کانکور په ازموینه کې یوازې نارینه برخه اخیستی شي.
پر افغانستان د طالبانو له بیا واکمنېدو وروسته دغې ډلې له شپږم ټولګي پورته د نجونو ښوونځي وتړل او پوهنتونونو ته یې هم د نجونو د تګ مخه ونیوله.
ددې ترڅنګ دغې ډلې په نادولتي ادارو کې ښځې له کار کولو منع کړې دي او د څه باندې پنځوسو فرمانونو په صادرولو سره یې پر ښځو پراخ بندیزونه لګولي دي.
په تېرو نږدې درېیو کلونو کې نړیوالې ټولنې په ځلونو له طالبانو غوښتي، چې د نجونو ښوونځي بېرته پرانیزي او پر ښځو لګیدلي بندیزونه لرې کړي، خو دغه ډله وایي چې دا د دوی کورنۍ مسله ده او هیچا ته په خپلو چارو کې د لاسوهنې اجازه نه ورکوي.
د ښځو پر وړاندې د طالبانو د محدودیتونو له امله د بشري حقونو سازمانونه وايي، چې دغې ډلې جنسیتي توپیر رامنځته کړی او ښځې یې له ټولنې ګوښه کړي دي.
د طالبانو تر کنټرول لاندې د هواپوهنې اداره وایي، چې نن او سبا (د غبرګولي په ۳مه او ۴مه نېټه) په ۲۱ ولایتونو کې د شړکنده باران، تالندې، تېزو سېلیو او سېلابونو د راوتو اټکل شوی دی.
دغې ادارې د یوې خبرپاڼې په خپرولو سره ویلي، چې دغه وړاندوینه د سالنګونو په ګډون د بدخشان، کونړ، نورستان، پنجشېر، تخار، کندوز، بغلان، کاپیسا، لغمان، پروان، کابل، سمنګان، میدان وردک، بلخ، بامیان، سرپل، دایکندي، جوزجان، فاریاب، بادغیس او غور ولایتونو لپاره شوې ده.
د خبرپاڼې له مخې، په بېلابېلو سیمو کې د باران کچه له ( ۱۵ تر ۵۰) ملي مترو اټکل شوې ده.
خبرپاڼې کاږلي، چې د سالنګونو په ګډون په شمالي، لوېدیځو، سوېلي او مرکزي ولایتونو کې د تېزو سېلیو اټکل هم شوې دی، چې د چټکوالي کچه یې په یوه ساعت کې له (۳۰ څخه تر ۸۰) کیلو متره اټکل شوې ده.
له بل پلوه په فاریاب، بغلان او سرپل ولایتونو کې تازه سېلابونو ۱۵ کسان مړه کړي او ۸ نور تري تم دي.
تر دې دوه ورځې وړاندې پېښو ته د رسېدو په چاروکو کې د طالبانو وزارت ویاند ویلي و، په تېرو نږدې لسو ورځو کې په افغانستان کې د سېلابونو له امله ۲۹۴ کسان مړه شوي دي.
جانان سایق په یوې خبري ناسته کې زیاته کړې وه، چې د وروستیو سېلابونو له امله شاوخوا ۱۵ زره کورونه وېجاړ شوي دي.
ښاغلي سایق ویلي، چې دغه مړینه روان کال د غويي له ۲۰مې د غبرګولي تر لومړۍ په بغلان، غور، تخار، فاریاب، بدخشان، سمنګان، بادغیس، بامیان او کاپیسا ولایتونو کې ځايي خلکو ته اوښتې ده.
د طالبانو تر واک لاندې باختر خبري اژانس د چهارشنبې په ورځ د (غبرګولي په دویمه) راپور ورکړی، چې د وینتوی او د اېټالیا د فلورانس پوهنتون پرېکړه کړې چې د سلو بامیاني کورنیو لپاره چې په سمڅو کې اوسېږي نوي کورونه جوړ کړي چې شاوخوا ۳۰۰ زره ډالره لګښت به پرې راشي.
داسې ویل کېږي، چې د دواړو بنسټونو مشران په بامیان کې د طالبانو له والي سره هم په دې اړه غږېدلي؛ خو د هغوی د خبرو جزییات نه دي په ډاګه شوي.
د باختر خبري اژانس لیکلي، چې دغه خلک له لسیزو را په دې خوا په دغو سمڅو کې اوسېدلي او دا یوه لرغوني سیمه ده چې د بامیان د بودا نړول شوې مجسمې ته نږدې پرته ده.
طالبانو د خپلې واکمنۍ په لومړي پېر کې د بودا دوه سترې مجسمې صلصال او شهمامه ونړولې.
دغه دواړه مجسمې له ۱۰۰۰ کالو ډېره موده دغلته ولاړې وې. د دغو دواړو مجسمو د ننه تاخچو او پر دېوالونو انځور ګري لا هم نړۍوال شهرت لري او ګڼ سېلانیان او لرغون پوهان یې د لیدو په تمه دي.