طالبانو د ناروې، اېرلنډ او اسپانیې هېوادونو لخوا د فلسطین دولت په رسمیت پېژندنې هرکلی وکړ
د طالبانو د بهرنیو چارو وزارت د ناروې، اېرلنډ او اسپانیې هېوادونو لهخوا د فلسطین دولت په رسمیت پېژندنه یو مثبت ګام بللی او له دغې پرېکړې یې هرکلی کړی دی.
د طالبانو د بهرنیو چارو وزارت د ناروې، اېرلنډ او اسپانیې هېوادونو لهخوا د فلسطین دولت په رسمیت پېژندنه یو مثبت ګام بللی او له دغې پرېکړې یې هرکلی کړی دی.
دغه وزارت نن جمعه ( د غبرګولي ۴مه) د یوې خبرپاڼې په خپرولو سره لیکلي:« دغه پرمختګ داسې مهال کېږي، چې اسراییلي ځواکونو په غزه کې د فلسطیني وګړو د ټولوژنې په جنګي جنایت د سترګو پټولو هڅه کوي.
خبرپاڼه کې راغلي، چې طالبان د اسراییلي ځواکونو لهخوا روانه «نسل وژنه» په سیمه کې د بې ثباتۍ بنسټیز لامل ګڼي او غندنه یې کوي.
د خبرپاڼې په وروستۍ برخه کې طالبانو یو وار بیا په اسلامي هېوادونو غږ کړی، چې په فلسطین کې د روان ناورین د مخنیوي لپاره بېړني ګامونه واخلي.
د ناروې حکومت د چهارشنبې په ورځ د یوې خبرپاڼې په خپرولو سره وویل، چې هېواد یې غواړي فلسطین د یوه خپلواک هېواد په توګه په رسمیت وپېژني.
له دې سره هممهاله د ایرلېنډ او اسپانیې مشرانو هم ورته خبرپاڼې خپرې کړې وې.
اسراییل بیا د ایرلېنډ او ناروې د پرېکړې په غبرګون کې له دغو دوو هېوادونو څخه خپل سفیران د بېړنۍ مشورې لپاره ورغوښتي دي.
د اسراييل د بهرنيو چارو وزير ويلي، که اسپانيا فلسطين په رسميت وپېژني له دغه هېواده به د اسراييل سفير هم د مشورې لپاره وروغواړي.
