د حماس د روغتیا وزارت او ځینو رسنیو خبر ورکړی، چې د پنجشنبې په ورځ د اسراییلي پوځ په ځمکنیو او هوايي بریدونو کې لږ تر لږه ۶۰ فلسطینیان وژل شوي دي. د راپورونو له مخې، د اسراییل پوځ او د حماس ډلې وسلهوال د رفح ښار په څنډو کې له یو بل سره په جګړه کېوتل.
د سیمې اوسېدونکي وایي، چې اسراییلي زغروالو ګاډو او شوبلو د رفح ښار په سوېل ختیځو برخو کې پرمختګ کړی.
روانه میاشت د اسراییل پوځ نویو بریدونو د غزې په شمالي او سویېي سیمو کې سلګونه زره فلسطینیان بې کوره کړي دي.
د دغو بریدونو له امله د بشري مرستو د رسولو لارې بندې شوې او په غزه کې یې د قحطۍ وېره هم زیاته کړې ده.
اسراییلي پوځ وایي، چې د حماس د وروستي سنګر د ماتولو لپاره پر رفح ښار له برید پرته بله لاره نه ده ورپاتې.
تر دې وړاندې د اسراییل پوځ ویاند ویلي و، چې د دوی ځواکونو د حماس ۱۸۰ تنه وسلهوال په رفح ښار کې وژلي دي.
د فلسطین د بېځایه شویو خلکو لپاره مرستندویه ټولنې ویلي و، چې د مې له لومړۍ نېټې راهیسې د اسراییلي پوځ له بریده وروسته ۸۰۰ زره فلسطینیان له خپلو مېنو بېځایه شوي دي.
د رفح ښار زیات اوسېدونکي هغه خلک دي، چې پر غزې د اسراییل له بریدونو وروسته له بېلابېلو سیمو هلته ورغلي دي.
د نړۍوالو د پر له پسې غوښتنو سره، سره چې له اسراییل یې غوښتي و چې پر رفح ښار به برید نه کوي؛ خو اسراییل بیا، بیا پر دغه ښار بریدونه کوي او وايي چې له دې پرته بله لار نه لري.
