د ملګرو ملتونو د خوړو نړېوال پروګرام وايي، په بدخشان ولایت کې د تازه راوتلو سېلابونو له امله لس کسان مړه شوي، کورونه او سړکونه یې ویجاړ شوي. دغه پروګرام د یک شنبې په ورځ د (غبرګولي شپږمه) په خپله اېکس پاڼه د سېلابونو راوتلو یوه ویډیو خپره کړې ده.
د دغه پروګرام د معلوماتو له مخې، په بدخشان کې د سېلابونو په تازه پېښو کې د دغه ولایت لس تنه مړه شوي.
د خوړو نړېوال پروګرام معلومات ښيي چې د یادو سېلابونو له امله د دغه ولایت د سېلاب ځپلو سیمو ځينې کورونه او سړکونه هم ویجاړ شوي دي.
د خوړو نړېوال پروګرام وايي؛ په تېرو څو اونیو کې د سېلابونو له امله په افغانستان کې ۸۰ زره کسان زیانمن شوي دي.
دا په داسې حال کې ده چې افغانستان د اقلیمي بدلون تر ټولو اغېزمن هېواد بلل شوی، او د سېلابونو له امله په کندهار، هلمند، روزګان، غور، فاریاب، کندوز، بغلان، بادغیس او بدخشان ولایتونو په ګډون په ګڼو سیمو کې سلګونه کسان مړه، زرګونه کسان زیانمن او په لسګونو زره جریبه کرنیزې ځمکې ویجاړې شوې دي.
