د طالبانو د ښار او کور جوړونې وزیر د چین له سفیر سره په کتنه کې چینایي پانګوالو ته د کابل په نوي ښار کې د پانګونې بلنه ورکړه. حمدالله نعماني له ژاو شینګ سره په لیدنه کې هیله څرګنده کړه چې له دې پانګونې سره به د چین او طالبانو ترمنځ اړیکې لا پیاوړې شي.
چین د نیلهباغ پروژې په ګډون په کابل کې په یو شمېر ښاري پراختیایي پروژو کې پانګونه کړې ده.
د طالبانو د ښار او کور جوړونې وزارت د دوشنبې په ورځ د (غبرګولي اومه) د چین د سفیر په حواله لیکلي چې هغه هیله څرګنده کړې چې چینايي پانګوال به د کابل نوې پروژه په زړه پورې وګڼي او پانګونه وکړي.د چین سفیر وویل چې په افغانستان کې د ځینو پروژو په بشپړیدو سره به د پانګونې کچه لوړه شي او دا کار د دواړو هېوادونو تر منځ د ښو اړیکو ژمنه کوي.د کابل نوی ښار د څو سوه میلیونو ډالرو په ارزښت پروژه ده چې د پخواني ولسمشر حامد کرزي د واکمنۍ پر مهال پلان او طرحه شوې وه او عملي کار یې د مخکني ولسمشر اشرف غني په دوره کې پیل شو، خو بشپړه نه شوه.د افغانستان د پخواني حکومت د نقشې له مخې، د کابل نوی ښار ۷۴۰ کیلومتره مربع مساحت لري او د کابل ولایت د ده سبز، شکردرې، قره باغ، کوه دامان، کلکان او باریکاب سیمې په کې شاملې دي.
د قطر د کار وزارت په خپله خبرپاڼه کې د طالبانو دغه چارواکي ته د افغانستان د اسلامي جمهوریت د کار او ټولنیزو چارو د وزیر خطاب کړی دی.
د قطر د کار وزارت د سې شنبې په ورځ (د غبرګولي تمه) خپلې اېکس پاڼه کې لیکلي، چې د قطر د کار وزیر علي بن سعید بن صمیخ المري د طالبانو د کار او ټولنیزو چارو له وزیر عبدالمنان عمري سره وکتل.
په دې خبرپاڼه کې د طالبانو د اسلامي امارت پر ځای د «افغانستان اسلامي جمهوریت» کارول شوی دی.
طالبانو هم قطر ته د عمري د سفر په اړه نن یوه خبرپاڼه خپره کړې او ویلي یې دي، چې د دغه سفر موخه د افغان کارګرانو ستونزې او قطر ته د ماهره او نیمه ماهره کارګرانو لېږل دي.
که څه هم قطر تر اوسه طالبان په رسمیت نه دي پېژندلي؛ خو د دغې ډلې د واکمنۍ له پېل راهیسې یې له دوی سره قوي ډېپلوماټیکې او اقتصادي اړیکې ټینګې کړې دي.