په کونړ او نورستان کې ځینو سیمهییزو سرچېنو افغانستان انټرنشنل ته وویل، چې نښته د وانټ وایګل ولسوالۍ کې د کېګل او ارنس قومونو ترمنځ د څړ ځایونو پر سر شوې او دواړو خواوو له سپکو او درنو وسلو کار اخیستی.
دغو سرچېنو دا هم وویل، چې په نښتو کې د اتو کسانو د وژل کېدو تر څنګ ګڼ کسان ژوبلېدلي هم دي؛ خو ځینې سرچېنې بیا د وژل شویو کسانو شمېر دوه کسه یادوي.
سرچېنې زیاتوي، چې د دواړو غاړو په منځ کې طالبان هم شته چې په سپکو او درنو وسلو سمبال دي.
د سیمې خلک وايي، سره له دې چې طالبان سیمې ته رسېدلي او جګړه درېدلې؛ خو د دې وېره شته چې یو ځلې بیا د دواړو خواوو تر منځ نښنې پیل او پراخې شي.
د دغو دوو قومونو تر منځ له پخوا راهیسې د څړ ځایونو او ځنګل پر سر وخت نا وخت نښتې شوې، چې دواړو غاړو ته مالي او ځاني زیانونه هم اوښتي وو.
د قطر د کار وزارت په خپله خبرپاڼه کې د طالبانو دغه چارواکي ته د افغانستان د اسلامي جمهوریت د کار او ټولنیزو چارو د وزیر خطاب کړی دی.
د قطر د کار وزارت د سې شنبې په ورځ (د غبرګولي تمه) خپلې اېکس پاڼه کې لیکلي، چې د قطر د کار وزیر علي بن سعید بن صمیخ المري د طالبانو د کار او ټولنیزو چارو له وزیر عبدالمنان عمري سره وکتل.
په دې خبرپاڼه کې د طالبانو د اسلامي امارت پر ځای د «افغانستان اسلامي جمهوریت» کارول شوی دی.
طالبانو هم قطر ته د عمري د سفر په اړه نن یوه خبرپاڼه خپره کړې او ویلي یې دي، چې د دغه سفر موخه د افغان کارګرانو ستونزې او قطر ته د ماهره او نیمه ماهره کارګرانو لېږل دي.
که څه هم قطر تر اوسه طالبان په رسمیت نه دي پېژندلي؛ خو د دغې ډلې د واکمنۍ له پېل راهیسې یې له دوی سره قوي ډېپلوماټیکې او اقتصادي اړیکې ټینګې کړې دي.