طالبانو د یوې خبرپاڼې په خپرولو سره ویلي، چې په افغانستان کې د اوږدې جګړې او بې ثباتۍ له امله اوسمهال دوی د اوو مېلیونو راستنو شویو کډوالو او درې مېلیونه کورنیو بې ځایه شویو کوربه دي.
خبرپاڼه کې راغلي، د افغان مهاجرینو ملاتړ، د هغوی په راستنیدو کې اسانتیاوې، د بېځایه شویو اړتیاوو پوره کوونه او له راستنېدونکو سره مرسته کول په تېرو دوو کلونو کې د طالبانو له مهمو لومړیتوبونو څخه دي.د خبرپاڼې له مخې، تېر کال کې له ایران، پاکستان او نورو هېوادونو څخه ۹۵۳ زره کډوال په خپله خوښه افغانستان ته راستانه شوي دي. د دې تر څنګ ۴۷۰ زره راستنېدونکو او بېځایه شویو کورنیو سره د دولتي او همکارو بنسټونو نغدي، خوراکي او غیر خوراکي مرستې شوې دي.خبرپاڼه کاږي، چې د جګړې، ناامنیو او طبیعي پېښو له امله د بې ځایه شویو د پام وړ شمېر سره، سره شاوخوا ۲۹ زره بېځایه شوې کورنۍ بېرته مېشتې شوې او ۱۶۰ زره کورنۍ بېرته خپلو سیمو ته ستنې شوې دي.خبرپاڼه کې راغلي، طالبان هڅه کوي چې له هېواده بهر ټول افغان بندیان بېرته هېواد ته ستانه کړي.خبرپاڼه زیاتوي، چې د افغان بندیانو د بېرته ستنولو په برخه کې تېر کال له ۸ هېوادونو سره د ډیپلوماټیکو خبرو اترو له لارې هوکړه شوې او د افغان بندیانو د لېږد په برخه کې د دغې ډلې د رهبرۍ له لوري یو ټاکل شوی کمېسیون هم جوړ شوی چې په دې برخه کې په فعاله توګه کار کوي.
د خبرپاڼې له مخې، د اړوندو چارواکو د هراړخیزو هڅو په پایله کې تېر کال شاوخوا درې زره افغانان د پاکستان له زندانونو او څه باندې زر تنه د ایران له زندانونو افغانستان ته لېږدول شوي او د دې ترڅنګ شاوخوا ۳۰۰۰ نور افغانان چې د انساني قاچاق له ګواښ سره مخامخ وو، ژغورل شوي دي.
د پاسپورټ خدمتونه
خبرپاڼه کې دا رنګه راغلي، چې په بهر کې د مېشتو افغانانو د ستونزو د مخنیوي لپاره طالبانو په چټکۍ سره داسې اقدامات کړي چې د پام وړ پایلې یې لرلې دي.
خبرپاڼه وایي، په تېر کال کې په بهرنیو هېوادونو په تېره بیا ایران، پاکستان او ترکیې کې مېشتو افغانانو ته د پاسپورټ د وېش بهیر پیل شوی، چې په په پایله کې یې تېر کال ۳۰۰،۰۰۰ پاسپورتونه په سیستماتیک ډول نوي شوي دي.
د قطر د کار وزارت په خپله خبرپاڼه کې د طالبانو دغه چارواکي ته د افغانستان د اسلامي جمهوریت د کار او ټولنیزو چارو د وزیر خطاب کړی دی.
د قطر د کار وزارت د سې شنبې په ورځ (د غبرګولي تمه) خپلې اېکس پاڼه کې لیکلي، چې د قطر د کار وزیر علي بن سعید بن صمیخ المري د طالبانو د کار او ټولنیزو چارو له وزیر عبدالمنان عمري سره وکتل.
په دې خبرپاڼه کې د طالبانو د اسلامي امارت پر ځای د «افغانستان اسلامي جمهوریت» کارول شوی دی.
طالبانو هم قطر ته د عمري د سفر په اړه نن یوه خبرپاڼه خپره کړې او ویلي یې دي، چې د دغه سفر موخه د افغان کارګرانو ستونزې او قطر ته د ماهره او نیمه ماهره کارګرانو لېږل دي.
که څه هم قطر تر اوسه طالبان په رسمیت نه دي پېژندلي؛ خو د دغې ډلې د واکمنۍ له پېل راهیسې یې له دوی سره قوي ډېپلوماټیکې او اقتصادي اړیکې ټینګې کړې دي.