د اسراییل د کورني امنیت وزیر: که نتانیاهو په غزه کې اوربند ته غاړه کیږدي، حکومت به ړنګ کړو
د اسراییل د کورني امنیت وزیر ایتامار بین ګوور وايي، که نتنیاهو د حماس د له منځه وړلو پرته د غزې د جګړې د پای ته رسولو هوکړه ومني، نو دی به حکومت ړنګ کړي.
د اسراییل د کورني امنیت وزیر ایتامار بین ګوور وايي، که نتنیاهو د حماس د له منځه وړلو پرته د غزې د جګړې د پای ته رسولو هوکړه ومني، نو دی به حکومت ړنګ کړي.
د اسراييل د ماليې وزير هم ويلي، چې که نتنياهو د حماس د له منځه وړلو او د يرغمل شويو کسانو له خوشې کولو پرته په غزه کې اوربند ته غاړه کېږدي، نو استعفا به ورکړي.
د اسراییل لومړي وزیر ویلي دي چې په غزه کې به دایمي اوربند تر هغه وخته پورې رانه شي چې د حماس پوځي وړتیاوې له منځه لاړې نه شي.
جوبایډن وویل چې دا هوکړه د اسراییل وړاندیز شوی نوی پلان دی چې په دریو پړاوونو؛ اوربند، د یرغمل شویو بندیانو خوشې کول او د غزې بیارغونه پکې شامله ده.
په ورته وخت کې قطر، مصر او امریکا د منځګړو په توګه له اسراییل او حماس څخه غوښتي چې دغه وړاندیز شوی تړون وروستی کړي.
د اسراییل د کورني امنیت وزیر ایتامار بین ګوور د شنبې په ورځ (غبرګولي ۱۲مه) په خپله ایکس پاڼه لیکلي چې د وړاندیز شوي تړون د جزیاتو له مخې چې اوس خپور شوی ، دغه تړون «د جګړې پای ته رسولو او حماس د پرېښودلو معنا لري.»
هغه وړاندیز شوی تړون یو «بې پروا تړون» بللی او لیکلي یې دي چې دغه «د ترهګرۍ بری او د اسراییل دولت لپاره یو امنیتي ګواښ دی.د داسې یوې هوکړې منل بری نه بلکې مطلقه ناکامي ده.»
ایتامار بین ګوور وړاندې لیکلي: «موږ به د حماس د بشپړ له منځه وړلو پرته د جګړې پای ته رسیدو اجازه ورنکړو.»
هغه ګواښ وکړ چې که نتانیاهو دغه تړون ته غاړه کیږدي، حکومت به ړنګ کړي.
د اسراییل د مالیې وزیر هم ګواښ کړی چې که نیتانیاهو وړاندیز شوې هوکړې ته غاړه کیږدي نو له خپلې دندې به استعفا وکړي.
