د امریکا ډیموکراټ سناتور برني سنډرز د کانګرس ګډې غونډې ته د وینا لپاره د اسراییل د لومړي وزیر پر بلنه نیوکه وکړه. برني سنډرز ویلي؛ چې «بنیامین نتنیاهو یو جنګي مجرم دی.» ښاغلي سنډرز زیاته کړه چې دی به په کانګرس کې د بنیامین نتنیاهو د وینا په غونډه کې ګډون و نه کړي.
د امریکا کانګرس د دواړو ګوندونو مشرانو د اسراییل لومړي وزیر ته بلنه ورکړې چې د کانګرس ګډې غونډې ته وینا وکړي.
تر اوسه پورې د دې غونډې وخت نه دی ټاکل شوی.
د اسراییل د لومړي وزیر دفتر منلې، چې بنیامین نتنیاهو د امریکا د کانګرس په ګډه غونډه کې د وینا کولو بلنه منلې ده.
د اسراییل د لومړي وزیر دفتر ویلي چې د نتانیاهو له نوې وینا سره هغه لومړنی بهرنی مشر دی، چې د امریکا د کانګرس ګډې غونډې ته په څلورم ځل وینا کوي.
بنیامین نتانیاهو وویل چې دی به په دې ګډه غونډه کې د اسراییل په استازیتوب خبرې وکړي او د هغو کسانو پر وړاندې به د اسراییل د جګړې په اړه د امریکا د خلکو استازو او نړۍ ته هغه حقیقت بیان کړي چې د ده په وینا د دغه هېواد د ورانولو غوښتونکي دي.
