د المان د تورینګن ایالت د کورنيو چارو وزير جورج ماير وايي، چې د «خطرناکه او مجرمو» کډوالو د ايستلو لپاره اړتيا نه شته له اسلامپالو طالبانو سره هوکړه وشي. هغه ویلي، چې له طالبانو سره د اړیکو نېولو پر ځای به د افغانستان له ګاونډیو هېوادونو لکه؛ پاکستان سره خبرې وکړي.
هغه وویل: «د المان د ملي امنیت ګټې د اسلامپالو افراطیانو د ملاتړ په پرتله ډېرې مهمې دي.»
دغه سیاستوال چې د سوسیال ډېموکرات ګوند غړی دی، د چهارشنبې په ورځ (د غبرګولي ۱۶مه) د المان له یوې راډیو سره په مرکه کې د فېډرالي حکومت پرېکړې ته له اشارې پرته له دغه هېواده د افغان کډوالو د ایستلو له پلان سره په ښکاره مخالفت وکړ.
هغه وړاندیز وکړ، چې مجرم او خطرناک افغان کډوال دې د افغانستان ګاونډیو هېوادونو ته واستول شي.
د المان د کورنیو چارو وزیر په مانهایم ښار کې د یوه افغان له وژونکي برید وروسته وویل؛هغه کسان، چې د المان امنیت ته احتمالي ګواښ جوړوي باید ژر تر ژره له هېواده وایستل شي.
د دغه بريد په تعقيب د المان ځینو ګوندونو د افغانستان او سوریې په ګډون خپلو هېوادونوته د سخت دریځو اسلامپالو او خطرناکو مجرمینو د لېږلو غوښتنه وکړه.
سلیمان عطايي د جمعې په ورځ (د غبرګولې۱۱مه)د مانهایم په ښار کې د اسلام د ښي اړخو منتقدینو په غونډه کې په چاقو په وسيله برید وکړ.
په دغه برید کې یو شمېر کسان ټپیان شوي او یو پولیس وژل شوی دی.
دغې مړینې د حکومتي چارواکو او الماني اتباعو پراخ غبرګونونه راپارولي دي.
