طالبان: جلال اباد کې ۲ شریکانو د سرو دوکان ته ځکه اور اچولی و چې له پوروړو ځانونه خلاص کړي
د ننګرهار لپاره د طالبانو امنیه قومانداني ویاند وايي، هغه دوه تنه شريکان یې نیولي چې د سرو زرو خپل دوکان ته یې په خپله اور اچولی و.
د ننګرهار لپاره د طالبانو امنیه قومانداني ویاند وايي، هغه دوه تنه شريکان یې نیولي چې د سرو زرو خپل دوکان ته یې په خپله اور اچولی و.
عبدالبصیر زابلی وايي، دوی له دوکان سره زر اېستلي او له پاکستان راوړي جعلي ډالر یې پکې اېښي وو او دغه کار سره یې غوښتل چې له پوروړو ځانونه خلاص کړي.
څو ورځې مخکې د جلال اباد ښار په اسحاقزي مارکيټ کي د سرو زرو دوکان اور اخیستی و او هغه مهال طالبانو ویلي وو، چې دا اور یې مړ کړی دی.
خو نن بیا د دې ډلې د امنیه قوماندانۍ ویاند ویلي، چې دې کسانو په خپله دوکان ته اور اچولی و.
د ښاغلي زابلي په خبره؛ دغو کسانو «د ګاونډي هېواد پاکستان څخه دوه نيم لکه جعلي ډالر راوړي وو، هغه يي په خپل د سروزرو په دوکان کې ايښي وو اصلي پيسې او سامان يې کور ته وړي وو، ورسته يي خپل دوکان ته اور اچولي وو.»
نوموړی وايي، تر اور اچولو وروسته د دې دوو شریکانو خپلمنځي جنجال جوړ شوی او په نتیجه کې د څلورمې امنيتي حوزې منسوبینو دواړه کسان نیولي دي.
طالبانو له دې دوو کسانو یوه ویډیو هم کړې چې وايي؛ دوکان ته یې په ګډه اور اچولی او غوښتل یې په دې کار سره له هغو خلکو ځانونه خلاص کړي چې پر دوی یې پور دی.
خو معلومه نه ده، چې دا ویډیو په څه ډول شرایطو کې شوې ده.
