د سوالګرو د راټولولو د کمېسیون مشر او په هرات کې د طالبانو د پولیسو د نشه یي توکو پر وړاندې د مبارزې د څانګې مدير وايي، دوی په دغه ولایت کې تر اوسه له ۶۰۰ زیات سوالګر راټول کړي. د طالبانو تر کنټرول لاندې باختر اژانس لیکلي، چې مستحقو سوالګرو ته به میاشتني معاشونه ورکول کیږي.
په هرات کې د سوالګرو د راټولولو کميسيون رييس او د طالبانو دپوليسو د نشه یي توکو پر وړاندې د مبارزې د برخې مدير حيات الله روحاني باختر اژانس ته ويلي:«غيري حقیقي سوالګر که بيا د سوال پر مهال ونیول شي محکمې ته به معرفي شي.»
د دغه طالب چارواکي په خبره، د دوی له خوا یتیمانو او سوالګرو ماشومانو ته تخنیکي او مسلکي زدکړې ورکول کیږي.
تر دې مخکې د طالبانو د عدلیې وزارت د غوايي میاشتي په ورستيو کې ويلي و، چې د دې ډلې مشر د سوالګرو د راټولولو او د سوال کولو د مخنیوي قانون تصویب کړی دی.
د دې قانون له مخې، «مسلکي او منظمه سوالګري» جرم دی او عاملین به یې په بند محکوم شي.
په دې قانون کې د سوال کولو لپاره د ماشومانو او معلولینو څخه ګټه اخيستل او استعمالول هم منعه شوی.
طالبانو تېر کال د مرغومي په میاشت کې ويلي وو، چې دوی د کابل ښار له بېلا – بېلو سېمو څخه تر ۴۸ زره ډېر سوالګر راټول کړي دي.
