د افغانستان د فوټبال ملې لوبډله به سبا د کابل پر وخت د شپې ۸ نيمې بجې د ۲۰۲۶ نړۍوال جام د دویم کواليفای پړاو د راتګ او د ۲۰۲۷ کال اسيايي جام ته د لارموندلو لپاره د اسيا د اتلې لوبډلې قطر پر وړاندې لوبه تر سره کړي.
د سياليو د لومړي ګروپ دغه لوبه به د افغانستان په کوربه توب د سعودي عربستان په شهزاده عبدالله لوبغالي کې تر سره شي.
افغان لوبډلې په دې سياليو کې تر دا مهال څلور لوبې کړې دي، يوه یې ګټلې، يوه یې مساوي کړې او د دوو لوبو په ماتې خوړلو سره د څلورو نومرو په درلودلو په جدول کې درېيم ځای لري.
په دې ليست کې قطر، هند، افغانستان او کويټ لوبډلې برخه لري، د قطر لوبډلې د دولسو امتیازاتو په لرلو سره بل پړاو ته لاره پېدا کړې ده.
د هند لوبډله د افغانستان سره یو ډول ۴ امتیازه لري؛ خو د بهترو ګولونو په توپير سره د افغانستان څخه مخکې او په جدول کې دویم ځای لري.
د افغانستان لوبډلې د ګولونو توپير منفي ۱۰ او د هند لوبډلې بیا منفي ۳ دی.
کويټ لوبډله د درې امتيازاتو په درلودلو سره د جدول په اخر کې ده.
له قطر سره تر لوبې پنځه ورځې وروسته د غبرګولې په ۲۲ به د افغانستان ملې لوبډله د کوېټ په کوربتوب په صباح السالم لوبغالي کې د شپې په ۱۰:۱۵ بجې بله لوبه تر سره کړي.
د افغانستان د فوټبال ملي لوبډلې د تېرو څلورو لوبو پایلې:
افغانستان ١- ٨ قطر (قطر کوربه)
افغانستان ٠-٤ کویت (افغانستان کوربه)
افغانستان ٠-٠ هندوستان (افغانستان کوربه)
افغانستان ٢-١ هندوستان (هندوستان کوربه)
