مجاهد: حقاني د امنیتي ارګانونو لپاره د اماراتو د ساختماني او صحي همکارۍ غوښتنه کړې
د طالبانو ویاند وايي، چې د دوی د کورنیو چارو وزیر د اماراتو له چارواکو څخه د دې ډلې د امنیتي ارګانونو لپاره په ساختماني او صحي برخه همکاري وغوښته.
د طالبانو ویاند وايي، چې د دوی د کورنیو چارو وزیر د اماراتو له چارواکو څخه د دې ډلې د امنیتي ارګانونو لپاره په ساختماني او صحي برخه همکاري وغوښته.
ذبیح الله مجاهد زیاتوي؛ سراج الدین حقاني «د امن شوي افغانستان د خوندیتوب او د سیمې د امن لپاره هلو ځلو کې د اماراتو د مرستې غوښتنه کړې.»
سراج الدین حقاني او د طالبانو د ملي امنیت لوی ریس عبدالحق وثیق د دې ډلې تر واکمنېدو را هیسې په لومړي ځل پرون په لومړني بهر سفر متحده عربي اماراتو ته لاړل.
دغو دوو مهمو امنیتي چارواکو پرون د کوربه هېواد له مشر محمد بن زاید بن سلطان ال نهیان سره ولیدل.
ذبیح الله مجاهد دغه سفر ته په اشاره نن په خپل اېکس کې وايي، چې ښاغلي حقاني له اماراتي چارواکو سره پر اتو مسالو خبرې کړې دي.
د نوموړي په خبره؛ دواړه لوري د خپلمنځي اړیکو پر پراختیا غږېدلي او همدارنګه ښاغلي حقاني د طالبانو د امنیتي ارګانونو سره په صحي او ساختماني برخه کې د اماراتو د همکاري غوښتنه هم کړې ده.
سراج الدین حقاني د کورنیو چارو وزارت د ترافیک ډیجیټل کولو کې هم د متحده عربي اماراتو د همکارۍ خواست کړی دی.
هغه زیاتوي، چې په دې لیدنه کې متحده عربي اماراتو د افغان بندیانو د خلاصون او د میکانیزم له مخې افغانانو ته د وېزو د ور کولو ژمنه هم کړې ده.
طالبان وايي؛ اماراتيچارواکو د افغانستان په بیارغونه او په دغه هېواد کې د پانګونې ژمنه هم کړې ده.
متحده عربي اماراتو لا د دې لیدنې او د بحث شویو موضوعاتو په هکله څه نه دي ویلي.
