د افغانستان فوټبال فدراسیون د فوټسال کمېټې خبر ورکړی، چې په ایران کې د افغان کډوالو لوبغاړو د فوټسال روزنیز او انتخابي کمپ پای ته ورسېد. په دې کمپ کې د افغان فوتسال د ۱۹ کلنو لوبډلې روزونکي محسن رضايي د افغانستان د ۱۷ کلنو او ۱۹ کلنو لوبډلو لپاره ۶۰ لوبغاړي غوره کړل.
دغه تمریناتي کمپ د ایران پلازمېنې ته څېرمه په قم ښار کې د افغانستان د ۱۹ کلنو د فوټبال د ملي لوبډلې د روزونکي محسن رضايي او د دغه ټیم د مرستیال روزونکي شکرالله مومند په مشرۍ د افغان کډوالو فوټسال لوبغاړو لپاره جوړ شوی و.
د کمپ په لومړي پړاو کې ۶۰ لوبغاړي وټاکل شول.
د طالبانو د حکومت ویاند ذبیح الله مجاهد څو شېبې مخکې د ملګرو ملتونو په مشرۍ د افغانستان لپاره د دوحې غونډې ته د دې ډلې د پلاوي د روانېدو خبر ور کړ. د قطر پلازمېنه دوحه کې دا دریمه غونډه سبا د دوو ورځو لپاره پیلېږي او په لومړي ځل پکې د ښاغلي مجاهد په مشرۍ طالب پلاوی ګډون کوي.
هغه انځور چې له روانېدو ذبیخ الله محاهد په خپل اېکس کې خپور کړی، د نوموړي او سهیل شاهین په ګډون د دې ډلې پنځه غړي ښيي.
ښاغلي محاهد له دې انځور سره لیکلي: «د افغانستان اسلامي امارت استازي د دوحې په غونډه کې د ګډون لپاره هغه هېواد ته روان شول.»
ښاغلي مجاهد دوحې ته تر روانېدو څو ګړۍ مخکې د حکومت د رسنیو په مرکز کې خبریالانو ته وویل، په دغه ناسته کې دوی له هغه وروسته برخه اخلي چې ملګرو ملتونو د دوی ځینې شرایط ومنل، خو نوموړي د دغو منل شویو شرایطو په اړه نور جزییات په ډاګه نه کړل.
هغه دا رنګه ویلي، چې په دغه ناسته کې به د افغانستان د کورنیو مسلو په اړه بحث نه کېږي او لامل یې دا ښودلی چې د افغانستان کورنۍ مسلې به په کور د ننه هوارېږي او له ملګرو ملتونو سره تړاو نه لري.
له دې سره یې له نړیوالې ټولنې د اقتصادي مرستې غوښتنه وکړه او زیاته یې کړه:« موږ د هېواد ملي ګټو ته په کتو له ټولو هېوادونو غواړو، چې د افغانستان خلک په سختو شرایطو کې یوازې پرېنږدي او د افغانستان په بیارغونه او اقتصادي پیاوړتیا کې ونډه واخلي او خنډونه لرې کړي.»
تېره اونۍ د پلاوي ټاکلو سره طالبانو وویل، چې پر مجاهد سربېره به د بهرنیو چارو، کورنیو چارو، صنعت او سوداګرۍ وزارتونو، دوحه کې د طالبانو د سیاسي دفتر مشر او د افغانستان بانک استازي په دغه غونډه کې ګډون کوي.
د طالبانو د افغانستان بانګ رییس هدایت الله بدری د اسلامي مالي خدمتونو بورډ ۲۲مه کلنۍ غونډه کې د ګډون لپاره جیبوټي ته نن روان شو. د افغاستان بانک وايي، دا غونډه د ۲ ورځو لپاره د اسلامي مالي خدمتونو بورډ او د جیبوټي د مرکزي بانک له لوري جوړېږي.
د طالبانو تر واک لاندې د افغانستان بانک په خپله برېښنا پاڼه کې جیبوټي ته له روانېدو وړاندې د هدایت الله بدري او مل پلاوي انځور خپور کړی دی.
د جولای په لومړۍ او دوهمه نېټه په غه دوه ورځنۍ غونډه کې د بورډ د تېر کال پر اجراتو او مالي راپورونو بحثونه کېږي او بیا به تصویب شي.
طالبان وايي، په دغه ناسته کې به د بورډ غړي هېوادونه د راتلونکي کال لپاره د شریعت د اصولو په رڼا کې د اسلامي بانکوالۍ اړوندو مغایرو، د مالي شرکتونو او بانکونو د ښه مدیریت، پر اسلامي بانکوالۍ د ډیجیټلایزیشن اثر او په نړیواله کچه د اسلامي بانکوالۍ او تمویل د ترویج په اړه پر پلانونو او عملي اقداماتو بحثونه وشي.
د افغانستان بانک د معلوماتو له مخې د اسلامي مالي خدمتونو بورډ (IFSB) یوه نړیواله اداره ده، چې د اسلامي مالي خدمتونو صنعت د سلامت او ثبات د پیاوړتیا لپاره معیارونه چمتو او خپروي.
دا معیاورنه د اسلامي شریعت او اصولو په چوکاټ کې د بانکوالۍ سکتور، مالي بازارونو او بیمې په برخه کې د هغو مؤسساتو لپاره رامنځته کېږي چې د اسلامي مالي خدمتونو صنعت په برخه کې فعالیتونه تر سره کوي.
د طالبانو واک لاندې د افغانستان بانګ تایدوي چې د افغانستان بانک، د اسلامي هېوادونو مرکزي بانکونه، اسلامي بانکونه او نړیوالې ادارې د اسلامي مالي خدمتونو د بورډ (IFSB) غړیتوب لري.
د ترکمنستان د بهرنیو چارو وزارت وايي، سږ کال به د افغانستان د ګاونډیو هېوادونو د بهرنیو چارو وزیرانو د پنځمې غونډې کوربه وي. د ترکمنستان د بهرنیو چارو وزارت مرستیال احمد قربانوف او د افغانستان لپاره د چین استازي ویوشیا یونګ د دې غونډه په اړه خبرې کړې دي.
د ترکمنستان د بهرنیو چارو وزارت پرون په یوه خبرپاڼه کې لیکلي، چې په دې کتنه کې دواړو د افغانستان د ګاونډیو هېوادونو د بهرنیو چارو وزیرانو د پنځمې غونډې د چمتووالي په اړه د نظرونه تبادله کړه.
د ترکمنستان د بهرنیو چارو وزارت وايي، په دې کتنه کې د دواړو هېوادونو چارواکو ټینګار وکړ، چې د دوستۍ او ښه ګاونډیتوب د اصولو په رعایت سره به د افغانستان له اقتصادي بیارغونې سره بشپړ ملاتړ ته دوام ورکړي.
د ترکمنستان د بهرنیو چارو وزارت مرستیال ويلي، چې نړیوالې غونډې د افغانستان د ثبات لپاره مهمې دي.
د افغانستان د ګاونډیو هېوادونو د بهرنیو چارو وزیرانو څلورمه غونډه د ۲۰۲۴ کال په اپرېل کې د ازبکستان په سمرقند ښار کې جوړه شوې وه.
په هغه غونډه کې د چین، ایران، پاکستان، روسیې، تاجکستان، ترکمنستان او ازبکستان د بهرنیو چارو وزیرانو ګډون کړی و.
افغانستان انټرنشنل ـ پښتو ته د طالبانو تر واک لاندې د افغان سرې میاشتې رسېدلي څلور مکتوبونه ښيي، چې د دې ادارې رییس او مرستیال د منابع بشري د مشر او نورو ګمارنو پر سره اختلافات لري. د سندونو له مخې د دې اختلاف له امله اوس دې ټولنه کې ۲ تنه د منابع بشري د رییس په توګه کار کوي.
د افغان سرې میاشتې د رییس مطیع الله خالص او مرستیال نورالدین ترابي له لاسلیک شويو مکتوبونو څرګندیږي چې د ښاغلي خالص په نشتون کې د هغه مرستیال ترابي د محمد حافظ په نوم کس د ټولنې لپاره د بشري منابعو نوی رییس ګومارلی دی.
په مقابل کې د سرې میاشتې ټولنې رییس مطیع الله خالص د خپل مرستیال په مقابل کې د دې ټولنې ریاست ته په خپلو مکتوبونو کې حکونه لېږلي دي.
په لومړي حکم کې لیکل شوي چې د رییس په نشتون کې سرپرست یا هم مرستیال حق نه لري چې ګمارنې وکړي او خپل د ریاست دفتر ته یې وړاندیز کړی چې په کمارانو کې د سرپرست او مرستیال وړاندیزونه دې نه مني ترڅو په اینده کې د داسې کډوډیو مخنوی وشي.
د ښاغلي خالص د مکتوب په پای کې لیکل شوي، چې د دې روانو نانداریو په اړه به ډېر ژر د طالبانو له رییس الوزرا ملا حسن اخوند سره خبرې وکړي.
د سرې میاشتې ټولنې مرستیال نورالدین ترابي په یوه مکتوب کې د طالبانو ریاست الوزرا ته شکایت کړی دی، چې عمومي رییس د دې ټولنې اړوند د مرکزونو، زونونو او ولایتي دفترونو مسولان ګمارلي دي.
د هغه په خبره، ډیری دا مسوولین د عمومي رییس اطاعت کوي، خو د مرستیال اطاعت نه کوي چې د ټولنې کارونه یې له خنډ او ځنډ سره مخامخ کړي دي.
په دغه مکتوب کې د طالبانو ریاست الوزرا ته وړاندیز شوی چې د حافظ محمد په نوم کس د افغان سرې میاشتې ټولنې منابع بشري په توګه تایید کړي. د مکتوب له مخې رییس الوزرا ملا محمد حسن اخوند هم دا وړاندېز تایید کړی دی.
په یو بل مکتوب کې نورالدین ترابي ملا حسن اخوند ته شکایت کړی، چې د نوموړي ګمارنې نه منل کیږي.
د همدې مکتوب په ځواب کې ملا حسن اخوند ورته د صلاحیتونو د ور کړې لپاره لاسلیک کړی دی .
د طالبانو تر واک لاندې په افغان سره میاشته ټولنه کې سرچینو افغانستان انټرنشنل ـ پښتو ته وویل چې اوس د دې ادارې په مرکزي دفتر کې دوه تنه د بشري منابعو د ریسانو په توګه کار کوي.
سرچینې زیاتوي د روانو اختلافاتو له امله د ټولنې عمومي رییس او مرستیال د ساتونکو ترمنځه د نښتې د رامنځته کېدو وېره هم شته.
د افغان سرې میاشتې رییس مطیع الله خالص د پخواني جهادي مشر مولوي خالص زوی دی او نور الدین ترابی د طالبانو په لومړۍ دوره کې د عدلې وزیر او د طالباتو د بنسټګر ملا عمر نژدې کس و.
د نظر خاوندان په دې باور دي چې د طالبانو بیا ځلي واکمنېدو سره د پخواني حکومت جوړې او فعالې ادارې ورته په مېراث پاتې شوې، خو خو د دونیم کلو په موده کې ښکاري چې د ورځې په تېریدو سره د واکونو پر سر د طالبانو تر منځ جنجالونه اداري سیسټم زیانمنوي.
د افغانستان په هکله د دوحې غونډې درشل کې نن په کابل د څلورو روغتونونو د کابل صحت طفل، ستوماتولوجي، شېخ زاهد او وزیر اکبر خان روغتونو کارمنو کاربندیز کړی. دغه معترضې وايي، د طالبانو د مشر له خوا دوی ته ټاکل شویو ۵ زره افغانیو تنخا باندې خپل ژوند او د کورنۍ لګښت نشي پوره کولی.
د طبي علومو یوې متخصصې د مېرمنو د تنخاو پر کمښت له اعتراض سره افغانستان انټرنشنل ته وویل پنځه زره افغانۍ سره د کور لکښت نشي پوره کولی.
د کابل وزیر اکبر خان روغتون د اعتراض ویډیوګانې چې افغانستان انټرنشنل ته رسېدلې پکې کارمنې د روغتون په انکړ کې را ټولې شوې دي.
د انساني حقونو د ادارو په ګډون د ښځو د حقونو فعالانو د طالبانو پر وروستۍ پرېکړه اعتراض کړی او د ښځو د لا ګوښه کولو او له کار د منع کولو په مانا یې بللی دی.
څه موده وړاندې د طالبانو د چارو ادارې خپلې مالي برخې ته په یوه لیک کې لیکلي و، چې د دې ډلې مشر ملا هبت الله د دولتي ادارو د ټولو کارمنو تنخا پنځه زره افغانۍ ټاکلې ده.
طالبانو د افغانستان د واک تر نیولو وروسته د دولتي ادارو کارکوونکې له دندو ګوښه کړې، خو په کور د معاشونو د ورکولو ادعا کوي.
د تېرې میاشتې په دغه ليک کې د طالبانو د چارو د ادارې د عمومي مشر نورالحق انور له قوله ليکل شوي، چې د ټولو ښځينه کارکوونکو تنخواوې په مساوي ډول ورکول کېږي.
په دغه مکتوب کې راغلي، چې « د پخوانيو دولتي ادارو ټولو ښځينه کارکوونکو ته چې اوس لوړ معاش ورکول کیږي، ټول معاشونه په بودیجوي او غيري بودیجوي واحدونو کې ټولو ته یو شان پنځه زره افغانۍ ټاکل شوي دي.»
له هغه راهیسې کارمنو د طالبانو د دغې پرېکړې په خلاف اعتراض کاوه، خو اوسنی منظم او ډله ییز اعتراض یې د قطر پلازمېنه کې د افغانستان په هکله د دوحې د دریمې غونډې په درشل کې دی.
د ملګرو ملتونو په مشرۍ دا غونډه سبا جوړېږي، چې طالب پلاوی هم پکې ګډون کوي، خو ښځو ته پکې برخه نه ده ور کړل شوې.