د هنګري لومړي وزیر د اروپايي ټولنې د مشرانو د غوښتنې خلاف له پوتین سره وکتل
د هنګري لومړي وزیر ویکتور اوربان، د روسیې له ولسمشر ولادیمیر پوتین سره د اوکراین د سولې په اړه خبرې اترې کړي دي.
د هنګري لومړي وزیر ویکتور اوربان، د روسیې له ولسمشر ولادیمیر پوتین سره د اوکراین د سولې په اړه خبرې اترې کړي دي.
اوربان له پوتین سره په داسې حال کې لیدلي چې د اروپايي ټولنې ځینو مشرانو هغه ته خبرداری ورکړی، چې د دغې ټولنې د دوره یي مشر په توګه دې له مسکو سره جوړجاړی نه کوي.
د هنګري لومړي وزیر په دې وروستیو کې د اروپايي ټولنې دوره یي مشري په غاړه واخیسته او له هغه وروسته یې د اوکراین له ولسمشر سره وکتل.
ویل کیږي چې نوموړی کییف ته د خپل سفر په دوام د سولې ماموریت لپاره مسکو ته تللی او هلته یې له ولادیمیر پوتین سره لیدلي دي.
د اروپايي کمېسیون مشرې ورزلا فون در لاین، له دې مخکې خبرداری ورکړی و، چې اوربان باید د اروپايي ټولنې د مشر په توګه مسکو ته سفر ونه کړي. هغې زیاته کړه چې د ۲۷ هېوادونو جوړه اروپايي ټولنه هوډ لري چې په اوکراین کې د عادلانه او تلپاتې سولې لپاره لاره هواره کړي.
همدا راز، ولادیمیر پوتین له ویکتور اوربان سره په لیدنه کې ویلي، چې چمتو دی چې د سولې د وړاندیز په جزییاتو او د دوه نیم کلنې جګړې د پای ته رسولو په اړه خبرې وکړي.
پوتین تیره میاشت وویل، چې روسیه به یوازې هغه وخت جګړه پای ته ورسوي چې کییف خپل د ناټو سره د یو ځای کیدو ارمانونه پریږدي او د هغه پلان سره موافقه وکړي. پوتین له اوکراین څخه وغوښتل چې د جګړې اوسنۍ کرښې دې د دواړو هېوادونو ترمنځ د پولې په توګه ومني.
ویکتور اوربان له اوکراین سره د لویدیځ د پوځي مرستو باندې نیوکې کوي او ویل کیږي چې د روسیې له مشر سره تودې اړیکې لري. هغه پوتین سره د لیدنې په تړاو وویل، چې د دغه سفر یې د اروپایي ټولنې د ماموریت برخه نه ده او دا چې سوله «په بروکسل کې راحتې څوکې» څخه نه شي رامینځ ته کیدای.
