حزب الله د اسراییل پر پوځي اډو تر ۲۰۰ ډېر توغندیز او ډرون بریدونه کړي دي. حزب الله د اسراييلو په بريد کې د دغې ډلې د جګپوړي قوماندان محمد ناصر تر وژل کېدو وروسته د پنجشنبې په ورځ پر اسراييل توغندیز او ډرون بريدونه ترسره کړل.
حزب الله وايي، چې دوی د اسراییل پر لسو پوځي اډو ۲۰۰ توغندیز او ډرون بریدونه کړي دي.
اسراییل د حزب الله بریدونه تایید کړي او ویلي یې دي، چې دغه بریدونه پولې ته څېرمه شوي.
د اسراییل پوځ ویلي، چې په دغو بریدونو کې یو سرتېری وژل شوی او څو نور سخت ټپیان شوي دي.
اسراییلي رسنیو ویلي، چې د امنیتي وضعیت له کبله له حیفا څخه تر نهاریه پورې د اورګاډي تګ راتګ ځنډول شوی دی.
د حزب الله او اسراییل ترمنځ حالت له هغه وروسته ترینګلی شو، چې پر غزې د اسراییل له بریدونو وروسته یې حزب الله د ملاتړ غږ اوچت کړ.
حزب الله وخت نا وخته په سره سمندرګي کې د اسراییل او د هغه هېواد د متحدینو بېړۍ هم په نښه کوي.
له بل پلوه په پام کې ده، چې د اسراییل د موساد ادارې مشر به په غزه کې د خونړۍ جګړې درولو او د اوربند په تړاو خبرو لپاره د مرکچي پلاوي په مشرۍ دوحې ته سفر وکړي.
د الجزیرې شبکې د سرچینو په خبره، د اسراییل د استخباراتو مشر ډیویډ برنیه به د پلاوي مشري وکړي او د خبرو اترو د نوي پړاو له پیل مخکې به د قطر له لومړي وزیر شیخ محمد بن عبدالرحمن الثاني سره وګوري.
