دغه لاریون چې په کې د بېلابېلو قومونو مشرانو، مخورو، د سیاسي ګوندونو استازو او غړو برخه لرله، د دغو عملیاتو سره یې مخالفت څرګند کړ او له حکومته یې وغوښتل، چې په دې اړه دې له خپلې کړې پرېکړې لاس په سر شي.
د دغه لاریون په ترڅ کې د میرعلي بازار په چورلټ ډول تړل شوی او لویې لارې او سړکونه د هر ډول ټرافیک لپاره تړل شوي وو.
لاریون کوونکو پر حکومتي چارواکو او پوځي مشرانو تور پورې کاوه، چې دوی د دغو عملیاتو په پلمه یو ځلې بیا غواړي له خپلو کلیو بانډو وشړي او د دوی ټوله شتمني لوټ او تالان کړي.
لاریونوالو دا غوښتنه هم کوله، چې د دوی نیول شوي کسان دې ژر تر ژره راخوشې کړای شي او د دوی د سیمې امنیت دې سیمهییزو مشرانو ته وسپارل شي.
دوی دا هم ویل، چې په ۲۰۱۴ کال کې چې کله پوځ د ضرب عضب په نامه پوځي عملیات ترسره کړي وو، له امله یې د سیمهوالو خلکو ټول کورونه ویجاړ شوي وو او خلکو ته په کې درنه مرګ ژوبله هم اوښتې وه.
دغو لاریونوالو ادعا کوله، چې له هغو عملیاتو وروسته هم په سیمه کې امن او سم سمکی نه دی راغلی او لا هم د دوی خلک بې کوره او بې وسه په نورو سیمو کې د کډوالۍ ژوند تېروي.
د پاکستان پوځ وايي، چې د شمالي وزیرستان په اړونده سیمو کې د وسلهوالو ډلو پتنځایونه دي او له دغو سیمو څخه د دوی پر ځواکونو وخت ناوخت وسلهوال بریدونه کېږي.
خو د سیمې اوسېدونکی بیا وايي، چې دغه عملیات د دوی د بېکوره کېدو او د دوی د ځپل کېدو لپاره جوړه شوې پلمه ده او په دې توګه پوځ غواړي چې سیمه نا امنه کړي او د دغې سیمې پر وسایلو خپله قبضه ټینګه کړي.
تر دې وړاندې په خیبر پښتونخوا او بلوچستان کې د ځینو سیاسي ګوندونو مشرانو هم د دغو عملیاتو سره مخالفت څرګند کړی و او له حکومته یې غوښتي و، چې په دې برخه کې دې د قومي مشرانو سره سلامشورو ته کېني.
بل خوا په سیمه کې بند مساپر وايي، د دغه لاریون له امله ټولې لویې لارې تړل شوي او خلکو ته یې زیاتې ستونزې زېږولې دي.
