له ترکیې څخه د بې اسناده افغانانو د اېستلو پر دوام، د دغه هېواد امنیتي سرتېرو ۲۹تنه افغان پناه غوښتونکي نیولي دي. د ترکي رسنیو د راپور له مخې، دغه افغانان د ترکیې په اغرې ښار کې په یوه ټېلر کې نیول شوي دي.
د دغه راپور له مخې، دغه کډوال تر نیول کېدو وروسته د دغه ښار د کډوالو ریاست ته د ثبتېدو لپاره لېږدول شوي دي.
د ترکیې اناتولي اژانس لیکلي، د دغه هېواد پولیسو د دغه ټېلر چلوونکی هم نیولی دی.په افغانستان کې د طالبانو له بیا واکمنېدو وروسته په زرګونه کسان پر ناامنه لارو د ایران او ترکیې له لارې غواړي ځانونه اروپا ته ورسوي، چې ډېری یې په دغو خطرناکو لارو کې مړه کېږي.د دې تر څنګ ترکیې په تېرو درېیو کلونو کې زرګونه افغانان تر نیول کېدو وروسته بېرته خپل هېواد ته ستانه کړي دي.د ترکي رسنیو په وینا، د بې اسناده افغان کډوالو د نیولو او پېژندلو لپاره په ټول هېواد کې سخت عملیات روان دي.
د طالبانو د فراه عدلیې ریاست یو مکتوب هم افغانستان انټرنشنل ته رسېدلې چې پکې یې د دې ولایت له معاملاتو لارښونې دفترونو او موټر پلورونکو غوښتنه کړې ده، چې له دې وروسته پېر او پلور کې یو فیصد مالیه د ولایت مستوفیت ته هم ځانګړې کړي.
خو په فراه کې د کورونو او ځمکو د پېر او پلور د لارښونې مرکزونو اتحاده وايي، چې د دولتي طرزالعمل له مخې د کورونو او ځمکو پېر او پلور او د قبالو جوړولو یو فیصد مالیه یوازې د بانک له لارې ښاروالۍ ته تحویل کېږي او د قانون له مخې مستوفیت له دوی د مالیې اخیستو حق نه لري.
دوی همدراز زیاتوی د عدلي وزارت د طرزالعمل له مخې د کور او ځمکې د پېر او پلور پرمهال د معاملاتو لارښونې دفتر له خپلې حق الزحمې هم ۱۰ فیصده ښاروالۍ ته ورکوي.
د فراه د معاملاتو لارښونې د اتحادیو مسوولین وايي، طالبان اوس د نویو اصولو پیلولو سره مستوفیت ته د یو فیصد اضافي مالیې پر پلي کېدو ټینکار کوي.
دوی وايي، ان طالبانو دا هم ورته ویلي چې په تېرو دریو کلونو کې د ټولو پلورل شویو کورونو او ځمکو یو فیصد مالیه هم مستوفیت ته تحویل کړی.
سرچینې وايي طالبانو د فراه معاملاتو لارښونې دوکاندارانو ته کواښ کړی دی، که د دوی نوی طرزالعمل عملي نه کړي او د تېرو دریو کلونو مالیه هم ور نه کړي نو جوازونه به یې د تل لپاره لغوه شي.
افغانستان انټرنشنل ـ پښتو ته رسېدلو ویډیوګانو کې معلومیږي چې د فراه د معاملاتو لارښونې دفترونه تړل شوي دي او مالکان یې له طالب له مشرانو غوښتنه کوي چې د دې ستونزې په حل کې مرسته وکړي.
طالبانو تر دې مخکې په کابل کې هم د معاملاتو لارښوونې دفترونو ته د نویو شرطونو په جوړولو سرخوږی جوړ کړ.
دې ډلې تېر کال د څو میاشتو لپاره د کابل شهزاده صراف صرافانو سره هم د نویو مالي شرطونو له امله جنجال درلود.
طالبانو په بیا واکمنېدو سره د خپلې ډلې د اقتصادي ستونزو د کمولو لپاره په بېلابیلو برخو لوړه مالیه ولګوله، چې له امله یې ځینې کسان د خپل کاروبار بندولو ته اړ شول.
