د پاکستان د حکومت د اپوزسیون مشر او د پاکستان تحریک انصاف ګوند د رهبرۍ شورا غړي عمر ایوب ویلي، چې د سرګودې د ترهګرۍ د مخنیوي محکمې د ده د نیولو حکم کړی او پولیسو یې پر کور چاپه اچولې ده.
په دې اړه عمر ايوب خان خپل بيان کې ویلي، چې د اسلام اباد او میانوالې پولیسو یې پر کور د ده د نیولو په موخه عملیات هم کړي دي.
هغه زیاته کړې، چې صوبايي حکومت د ده د نیولو په موخه بېلابېلې پلمې جوړوي.
ياده دې وي، چې تر دې وړاندې د اسلام اباد د ترهګرۍ ضد محکمې د خېبرپښتونخوا مشر وزیر علي امين ګنډاپور د ورانکارۍ او اور وژنې په مقدمو کې د نه حاضرېدو په تور د هغه د نیولو حکم ضادر کړی و؛ خو وروسته محکمې ته حاضر شو.
دا مهال د پاکستان تحریک انصاف ګوند د رهبر عمران خان په ګډون د دغه ګوند ګڼ غړي په زندان کې دي.
د ملګرو ملتونو د کډوالو برخې مشر فلیپو ګرانډي د یوه درې ورځني سفر په موخه پاکستان ته ځي. د کډوالو عالي کمېشنرۍ او پاکستاني چارواکو هم تایید کړه، چې ښاغلی ګرانډي د افغان کډوالو د ستونزو په اړه د خبرو اترو لپاره پاکستان ته سفر کوي.
د ملګرو ملتونو د یاد لوړپوړي چارواکي دغه سفر په داسې حال کې کېږي، چې د پاکستان حکومت له دغه هېواده د افغان کډوالو د اېستلو د دویم پړاو د پیلېدو په درشل کې دی.
ټاکل شوې، چې ښاغلی ګرانډي په دې سفر کې د پاکستاني چارواکو تر څنګ له افغان کډوالو سره هم وګوري او د افغان کډوالو د ستونزو او هېواد ته د هغوی د بېرته ستنېدو په اړه خبرې وکړي.
ویل کیږي، چې ښاغلی ګرانډي به د دوشنبې په ورځ په پېښور کې له افغان کډوالو سره وګوري او تر هغه وروسته به اسلام اباد ته ولاړ شي.
د طالبانو تر واک لاندې ملي راډیو ټلویزیون د افغان کډوالو د ستونزو د حل په برخه کې د طالب چارواکو له قوله پاکستان ته د فلیپو ګرانډي سفر مهم بللی دی.
په دې وروستیو کې له پاکستان څخه د بې اسنادو افغان کډوالو د ایستلو د دویم پړاو د پیلېدو راپورونه ورکړل شوي دي.
په دې وروستیو کې داسې راپورونه خپاره شوي، چې په دویم پړاو کې به هم له پاکستان څخه ناقانونه کډوال و اېستل شي.
د راپورونو له مخې؛ تمه کیږي چې په دغه دویم پړاو کې شاوخوا ۸۰۰ زره کسان افغانستان ستانه کړای شي.
د ملګرو ملتونو د کډوالو برخه د بې اسنادو کډوالو د اېستلو په اړه اندېښنه لري.
دا په داسې حال کې ده، چې پاکستاني چارواکو یو شمېر افغانان په پاکستان کې په "ترهګریزو" پېښو کې په لاس لرلو تورن کړي او له همدې امله د دوی د اېستلو د پلان په عملي کېدو ټینګار کوي.
خو طالبان بیا په پاکستان کې په ترهګریزو پېښو کې د افغانانو لاس لرل ردوي.
د طالبانو د کډوالو او راستنېدونکو چارو وزارت وايي، یاد کډوال تېره ورځ د نیمروز ولایت د ورېښمو پله، د کندهار د سپین بولدک، او د ننګرهار د تورخم له لارو له دوه ګاونډویو هېوادونو له لوري راستانه کړل شول. د دغو کډوالو ټول شمېر ۱۹۲۹ تنو ته رسیږي.
د طالبانو د کډوالو او راستنېدونکو چارو وزارت له لوري د یکشنبې په ورځ د (چنګاښ۱۷مه) په خپره شوې خبرپاڼه کې راغلي، چې تېره ورځ له پاکستان او ایران هېوادونو څخه د نیمروز ولایت د ورېښمو پله، د کندهار د سپین بولدک او ننګرهار د تورخم له لارو نږدې دوه زره افغان کډوال راستانه کړل شول.
په خبرپاڼه کې ویل شوي چې یاد کډوال له پاکستانه په زور او له ایرانه په زور او خپله خوښه راستانه کړل شوي دي.
د طالبانو د یاد وزارت په خبرپاڼه کې ویل شوي، چې ۵۴ کورنۍ چې د غړو شمېر یې ۳۰۳ تنو ته رسیږي د تورخم او ۹۱ کورنۍ چې د غړو شمېر یې ۴۵۰ تنو ته رسیږي د سپین بولدک له لارې په زور د پاکستان حکومت له لوري افغانستان ته ستانه کړل شوي دي.
همدارنګه یاد وزارت وايي، ۱۱۷۶ تنه بیا په خپل خوښه او زور له ایرانه راستانه کړل شوي دي.
طالبان وايي، یاد کډوال یې د مرستو تر لاسه کولو په موخه د کډوالۍ نړېوال سازمان، د ملګرو ملتونو د کډوالو عالي کمېشنرۍ او د خوړو نړېوال پروګرام ته ورپيژندلي دي.
دا په داسې حال کې ده چې د تېر کال راهیسې له پاکستان او ایران هېوادونو څخه د افغان کډوالو د اېستلو لړۍ دوام لري او د طالبانو د کډوالو او راستنېدونکو چارو وزارت تېره ورځ د یوې خبرپانې په خپرولو سره ویلي، چې د (چنګاښ له ۱۲مې تر ۱۵مې) د ورېښمو پله، سپین بولدک او تورخم له لارو ۱۱ زره او ۹۷۷ تنه افغان کډوال راستانه کړل شوي دي.
تحریک طالبان پاکستان یا ټي ټي پي د یوې خبرپاڼې په خپرولو سره ویلي، چې په تېرو شپږو میاشتو کې یې د پاکستان په بېلابېلو سیمو کې پر پاکستاني نظامیانو په ۴۹۷ برېدونو کې ۴۸۳ نظامیان وژلي، ۶۴۹ تنه یې ټپیان کړي او درې یې ژوندي نیولي.
پاکستاني طالبانو د یکشنبې په ورځ د (چنګاښ ۱۷مه) د یوې خبرپاڼې په خپرولو سره ویلي، چې د ۲۰۲۴ کال په لومړیو شپږو میاشتو کې یې په دغه هیواد کې پر پاکستاني نظامیانو او استخباراتي کارمنانو ۴۹۷ بریدونه کړي.
د پاکستاني طالبانو خبرپاڼه زیاتوي، چې په دغو بریدونو کې یې د پاکستاني ادارو ۶۰ کشفي کمرې، ۳۶ عرادې پوځي موټر او ۱۲ پوځي ودانۍ په بشپړ ډول ویجاړې کړې دي.
په خبرپاڼه کې ویل شوي چې ټي ټي پي په ملکنډ ډویژن کې ۳۶ په هزاره کې ۱ په ډېره اسماعیل خان کې ۱۸۴، په شمالي پنجاب کې ۱، کوهاټ کې ۱۵، په جنوبي پنجاب کې ۸، کراچۍ کې ۱،په کوټه کې ۱۳، په مکران کې ۱، بلوچستان کې ۱، ژوب کې ۲، بنو کې ۱۴۴، پېښور کې ۸۰ او مردان کې ۱۰ بریدونه کړي دي.
د ټي ټي پي په خبرپاڼه کې وړاندې راغلي چې د دغو جګړو پر مهال یې له پاکستاني نظامیانو څځه یو شمېر وسلې او ګرځنده ټیلیفونونه هم ترلاسه کړي دي.
د پاکستان امنیتي ادارو تر دې مهاله د ټي ټي پي د دغو شپږو میاشتو بریدونو د راپور په اړه څه نه دي ویلي، چې پاکستاني نظامیانو ته یې د ۱۱۳۲ تنو د مرګ ژوبلې اړولو دعوه کړې.
د پاکستان حکومت او پوځي ادارې تل دعوه کوي چې د ټي ټي پي پټنځایونه په افغانستان کې دي او له هغه ځایه په پاکستان کې د بریدونو لپاره ځانونه چمتو کوي.
خو طالبانو د پاکستان دا ډول ادعاوې تل رد کړې دي او دغه موضوع یې د پاکستان کورنۍ موضوع بللې.
د پاکستان لومړي وزير شهباز شريف د ایران د ولسمشر او د بریتانیا لومړي وزیر ته په ټاکنو کې د بریالیتوب مبارکې ورکړې او له دوی سره یې د ګډ کار او د خپلمنځي اړیکو د پراختیا هیله کړې ده.
شهباز شریف خپل اېکس کې د بریتانیا لومړي وزیر کېیر سټارمر ته پر مبارکۍ ویلو سربېره لیکلي، چې اسلام اباد له بریتانیا سره د لا ډېر نږدې ګډ کار او د اړیکو نږدې کېدلو هیله لري.
د کېر سټارمر کارګر ګوند د وړمې ورځې د ټاکنو په نتیجه کې د بریتانیا د پارلمان اکثریت خپل کړ او تر لسو کلونو وروسته بیا واک ته ورسېد.
شهباز شریف د ایران نوي ولسمشر مسعود پزشکیان ته هم په ټاکنو کې د بریالیتوب مبارکي ور کړې ده.
شريف ويلي، چې سيمه یيزې سولې او ثبات ته وده ورکولو لپاره د دواړو هېوادونو ګډ کار او هڅو ته سترګي په لار دی.
په ورته وخت کې د پاکستان ولسمشر اصف عالي زرداري د ایران د نوي ولسمشر ټاکل کېدو سره هيله ښودلې، چې د اسلام اباد او تهران اړيکې به نوري هم پياوړي شي.
زرداري زياتوي: «پاکستان له ایران سره د سولې لپاره ګډ کار ته لېوال دی»
د ایران د ولسمشریزو ټاکنو په دویم پړاو کې مسعود پزشکیان د ټاکنو دویم پړاو کې له خپل سیال سعید جلیلي د ډېرو رایو په تر لاسه کولو سره د دغه هېواد نوی ولسمشر شو.
په پاکستان کې '' عزمِ استحکام'' عملياتو پر وړاندې له پراخو غبرګونونو وروسته د عاصم منیر په مشرۍ د پوځي قوماندانانو په غونډه کې د دغو عملیاتو په ترسره کولو یو ځلې بیا ټینګار وشو.
د پوځ په يوه بيان کې راغلي، د '' عزمِ استحکام'' په نامه د عملياتو موخه د ترهګرۍ لمنځه وړل او له ناقانونه فعاليتونو د مخنیوي په کار کې مبارزه ده.
په دغه بيان کې راغلي، د يو څو کړيو لهخوا په ''عزمِ استحکام'' بې بنسټه نیوکې او په قصدي توګه د خپلو شخصي ګټو لپاره بې ځایه څرګندونې د اندېښنې وړ دي.
د پوځ په بيان کي زیاته شوې، په دې غونډه کې د سیمې پر امنیتي وضعیت او په ځانګړې توګه د افغانستان په اړه هم خبرې وشوې او د سیمې د سولې او امنیت لپاره یې پر خپلو ژمنو ټینګار وکړ.
تر دې وړاندې د عمران خان په مشرۍ د پاکستان تحريک انصاف ګوند، د مولانا فضل الرحمن په مشرۍ د جمعيت علماي اسلام ګوند، جماعت اسلامي ګوند، عوامي نېشنل پارټۍ او ځينو نورو ګوندونو د دغو عملياتو سره مخالفت ښودلی و.
له بل پلوه تېره ورځ د خیبرپښتونخوا په میرعلي کې سلګونه کسانو د دغه عملیاتو پر ضد لاریون وکړ.
دغه لاریون چې په کې د بېلابېلو قومونو مشرانو، مخورو، د سیاسي ګوندونو استازو او غړو برخه لرله، د دغو عملیاتو سره یې مخالفت څرګند کړ او له حکومته یې وغوښتل، چې په دې اړه دې له خپلې کړې پرېکړې لاس په سر شي.
لاریون کوونکو پر حکومتي چارواکو او پوځي مشرانو تور پورې کاوه، چې دوی د دغو عملیاتو په پلمه یو ځلې بیا غواړي له خپلو کلیو بانډو وشړي او د دوی ټوله شتمني لوټ او تالان کړي.
