د هند تر ولکې لاندې کشمير کې په یوه برید کې څلور سرتېري وژل شوي او شپږ نور ټپیان دي

د هند تر واک لاندې کشمير کې پر هندي سرتېرو د ناپېژانده کسانو په برید کې څلور هندي سرتېري وژل شوي دي. په دغه برید کې ۶ نور سرتېري هم ټپیان شوي، چې د دوو تنو روغتیايي حالت نازک ښودل شوی دی.

د هندي رسنیو د راپورونو له مخې، په کتوا ولسوالۍ کې د هندي پوځیانو پر موټر د لاسي بمونو برید شوی او له هغه وروسته پرې ډزې هم شوې دي.
له بريد وروسته هندي پوځ سيمه کلابنده کړې او په پراخه کچه يې چاڼیز عمليات پيل کړي دي.

لاتراوسه د دغه برید پړه کومې ډلې په غاړه نده اخیستې.