ملا عبدالغني برادر وايي، د افغانستان په شپږو ولایتونو کې د یادې ډلې د مشر ملا هبت الله اخوند د حکم په اساس د صادراتو د پروسس زونونه جوړېږي. همدارنګه برادر وايي، له ګاونډیو هېوادونو سره پر پوله د قاچاقو د مخنیوي په موخه به سکنرونه هم نصب کړي.
د طالبانو د ریاست الوزرا اقتصادي مرستیال ملا عبدالغني برادر د پنجشنبې په ورځ د (چنګاښ ۲۱مه) د صادراتو د ملي ورځې لمانځ ورځې تر سرلیک لاندې غونډې ته په وینا کې وویل، چې د یادې ډلې د مشر ملا هبت الله اخوند د حکم په اساس به د نړۍوالو میعارونو سره سم د کابل په ګډون د افغانستان په شپږو ولایتونو کې د صادراتو د پروسس زونونه جوړ شي.نوموړی زیاتوي، چې هر زون پر سل جریبه ځمکه جوړېږي.ښاغلی برادر وايي، د صادراتو د پروسس د زونونو لپاره د ځمکو د انتقال او ملکیت چارې بشپړې شوې دي او ډېر ژر به د افغانستان د صادراتو د معیاري کولو لپاره ګټې اخیستنې ته چمتو شي.همدارنګه ملا برادر وایي، له سیمهییزو او نړۍوالو هېوادونو سره د طالبانو اقتصادي، سوداګریزې او سیاسي اړیکې تر پخوا زیاتې غوړېدلې او له هغو سره یې د سوداګرۍ، صادراتو، ګمرکي تسهیلاتو او د پانګونې د مهمو مسایلو اړوند ګټورې خبرې شوې دي.ملا برادر وايي، د سیمي او نړۍ له هېوادونو سره اړیکې به پر مشخصو هېوادونو د افغانستان صادراتي تکیه راکمه او افغاني توکي به بدیل مارکیټونه ولري.دا په داسې حال کې ده، چې دمګړۍ طالبان یوازې، د پاکستان، ایران او ازبکستان سره نږدې سوداګریزې اړیکې لري او لا هم د دغو هېوادونو په ګډون تر اوسه هېڅ یو هېواد هم دغه ډله په رسمیت نه ده پېژندلې.
