یوه پخوانۍ ویډیو چې په خواله رسنیو کې لاس په لاس کېږي، پکې د ایران د بهرنیو چارو پخواني وزیر ویلي چې له امریکا سره د بن په غونډه کې په افغانستان کې د شاهي نظام پر جوړېدو پرېکړه شوې وه؛ خو ایران دغه پلان شنډ کړ.
ښاغلي ظریف په دې پخوانۍ مرکه کې دا څرګندونې د ایران د پخواني پاچا د زوی له څرګندونو وروسته پر ټولنیزو رسنیو کې کړي، چې اوس د خلکو تر منځ لاس په لاس کېږي.
هغه وايي، چې ایران او امریکا د حامد کرزي په مشرۍ او په افغانستان کې د شاهي نظام د مخنیوي په اړه هوکړه کړې وه.
په دې لنډ کلېپ کې ښاغلی ظریف وايي:« موږ باید هلته ویلي وای، چې امریکا په افغانستان کې شاهي نظام نه غواړي او یا غواړي چې دا کار وکړي؛ خو موږ یې باید مخنیوی وکړو.»
ظریف وویل، اروپایانو د سلطنت د پوځي احیا او د ستار سیرت د صدراعظمۍ ملاتړ کاوه.
د ایران د بهرنیو چارو پخواني وزیر کابو څلور میاشتې مخکې له حقوقي فکرونو ټولنې سره په مرکه کې ویلي و:« د ۲۰۰۱ کال یعنی د ۱۳۸۰ او ۱۳۸۲ تر منځ کلونو کې موږ له شرایطو څخه ښه ګټه پورته کړه. یعني موږ په ۲۰۰۱ کال کې د بن په کنفرانس کې د افغانستان د خلکو د ګټو او د ایران د امنیتي ملحوظاتو په نظر کې نیولو سره د نوي افغان حکومت په جوړولو کې تر ټولو مهم رول ولوباوه.»
ښاغلی ظریف په دغه مرکه کې د ایران د بهرنیو چارو په وزارت کې د خپلې اته کلنې دورې د مهمو سیاسي حالاتو په اړه وايي:« دا مه هېروئ، چې د امریکا ملګرو غوښتل په افغانستان کې د طالبانو ښه حکومت رامنځته کړي او یا هم اروپایانو غوښتل چې افغانستان ته شاهي نظام را وګرځوي. دا ایران و، چې د دې غلطو لارو مخه یې ونیوله.»
هغه وویل، چې اسلامي جمهوریت د بن په کنفرانس کې خپلې ټولې غوښتنې پوره کړې.
د چهارشنبې په ورځ (د چنګاښ په ۲۰مه) د ایران پخواني ولیعهد شهزاده رضا پهلوي په واشنګټن کې په یوه وینا کې وویل چې امریکا په افغانستان کې د محمد ظاهر شاه په مشرۍ د مشروطه شاهي نظام له جوړېدو سره مخالفت کاوه.
هغه وویل:«په افغانستان کې د طالبانو تر واکمنۍ وروسته ۷۰ سلنه قومي پارلمان(لویه جرګې)غوښتل، چې د ظاهر شاه مشروطه پاچاهي بېرته را ژوندۍ کړي. ځکه خلکو هغه ته د خپل خوړلي عمر سره، سره د ملي یووالي د سمبول په سترګه کتل؛ خو د امريکا حکومت دغه ملي غوښتنه او د دوی د حاکميت حق رد کړ.»
شهزاده پهلوي په افغانستان کې د شاهي نظام له جوړېدو سره د امریکا مخالفت "ویجاړوونکی" وباله او ویې ویل، چې دا ډول سیاست نه امریکا ته امنیت راوست او نه هم د هېواد له ارزښتونو په دفاع کې بریالی شو.
ښاغلی پهلوي د ۲۰۰۱ کال لویې جرګې ته اشاره کوي، چې په کې استازیو د انتقالي حکومت مشر ټاکلی و.
په دې غونډه کې حامد کرزى چې د امريکا لهخوا ملاتړ شوى نوماند و، د رايو په اکثريت سره وټاکل شو.
د ګارډین ورځپاڼي د راپور له مخې، د ۱۳۸۱ کال (د غبرګولي په ۲۳مه) د لویې جرګې یو شمېر غړو پر امریکا تور ولګاوه چې پر محمد ظاهر یې فشار راوړ چې د انتقالي حکومت د مشر لپاره ځان ونه نوموي.
د موقت حکومت د بهرنیو چارو وزیر ډاکټر عبدالله عبدالله دا خبره رد کړه، چې ګواکې پخوانی پاچا د امریکا تر فشار لاندې د کرزي پر ضد له سیالۍ څخه وتلی دی.
