د سعودي عربستان سفیر بیا کابل ته ستون شو
د سعودي عربستان سفیر له یو نیم کال وروسته بیا کابل ته ستون شو. د طالبانو د بهرنیو چارو وزیر د پنجشنبې په ورځ په کابل کې د سعودي عربستان له سفیر فیصل بن طلق البقمي سره کتلي دي.
د سعودي عربستان سفیر له یو نیم کال وروسته بیا کابل ته ستون شو. د طالبانو د بهرنیو چارو وزیر د پنجشنبې په ورځ په کابل کې د سعودي عربستان له سفیر فیصل بن طلق البقمي سره کتلي دي.
امیر خان متقي په دې کتنه کې هیله څرګنده کړه، چې د دواړو هېوادونو ترمنځ ډیپلوماټیک ماموریت کچه زیاته شي.
سعودي عربستان د ۱۴۰۱ د سلواغې په ۱۳مه په کابل کې خپل سفارت تړلی و.رویټرز خبري اژانس په هغه وخت کې د سرچینو په حواله راپور ورکړی و، چې د سعودي عربستان ډیپلوماټانو په کابل کې د ترهګریزو بریدونو د وېرې له امله کابل پرېښی او پاکستان کې مېشت شوي و.په دې وروستیو کې د طالبانو ویاند ذبیح الله مجاهد په دوحه کې د سعودي عربستان له ډیپلوماټانو سره تر لیدنې وروسته وویل، چې دغه هېواد غواړي په کابل کې خپل سفارت بېرته پرانیځي.د طالبانو د بهرنیو چارو وزارت وايي، چې امیر خان متقي د سعودي له سفیر سره په کتنه کې د سعودي عربستان له خلکو سره د افغانانو پر کلتوري، تاریخي او دیني مشترکاتو ټینګار کړی او ویلي یې دي، چې له ریاض سره د اړیکو پراخولو ته لېواله دي.ښاغلي متقي هیله څرګنده کړه، چې د ښاغلي فیصل البقمي د ماموریت پر مهال به د دواړو هېوادونو ترمنځ اړیکې پراخې شي.له دې سره، د افغانستان لپاره د سعودي عربستان سفیر هم د دواړو هېوادونو ترمنخ تاریخي اړیکو ته اشاره وکړه او زیاته یې کړه، چې په افغانستان کې به بشردوستانه او په نورو برخو کې مرستو ته دوام ورکړي.د طالبانو د بهرنیو چارو وزارت وایي، چې البقمي د امنیت د ټینګښت او له نشه یي توکو سره د مبارزې په برخه کې د طالبانو هڅې ستایلې دي.تر دې وړاندې د طالبانو ویاند ویلي و، چې سعودي عربستان مهم هېواد دی او له دې هېواد سره اړیکې د ارزښت وړ دي.
