په کندهار کې د طالبانو د مخابراتو او ټېکنالوژۍ رییس وایي، چې د مخابراتي شبکو د پوښښ د زياتېدو لپاره يې په ۱۸ ولسواليو کې د مخابراتو شبکو د نويو سايټونو د جوړېدو چارې پيل کړي. نورالله نوري وایي؛ د دغو سایټونو د جوړولو موخه په لېرو سېمو کې د ټلیفوني شبکو او انټرنيټ کيفیټ لوړول دي.
په کندهار ولایت کې د طالبانو د والي دفتر د دوشنبې په ورځ «د زمري ۱۵مه» په يوې اعلاميه کې ويلي، چې د دې سايټونو په جوړېدو سره به د مخابراتي پوښښ ساحه هم پراخه شي.
په کندهار کې د طالبانو د مخابراتو ادارې مسوولين وايي، چې په ټولو هغو سیمو کې به د مخابراتي شبکو ساحې پراخې کړي، چې تر دې وړاندې پکې د ناامنۍ له کبله کمزوري او يا نه وې.
د طالبانو د مخابراتو او ټېکنالوژې ادارې مخکې ويلي وو، چې تر ۲۰۲۵ کال پورې به د افغانستان ټولې ساحې تر خپلو مخابراتي پوښښ لاندې راولي.
د افغانستان د لېرو پرتو سیمو ډېری اوسېدونکي لا هم مخابراتي شبکو ته لاس رسۍ نه لري او په یو شمېر سیمو کې خلک بیا د مخابراتي شبکو له کمزوري فعاليت څخه شکايت کوي.
طالبانو د جمهوریت پر مهال د افغانستان په یو شمېر لېرې پرتو سیمو کې مخابراتي سایټونه نړولي یا یې بند کړي وو.
