د بنګله دېش لومړۍ وزیرې هند 'ته د تګ په شپه د پوځ ملاتړ له لاسه ورکړی و'
رویټرز په یو ځانګړي راپور کې ویلي، چې د پوځ قوماندان د بنګله دېش لومړۍ وزیرې شیخ حسینې ته د هغې د تېښتې په شپه خبر ورکړی و، چې نور نه شي کولای د خلکو پر تګ راتګ بندیز پلی کړی.
رویټرز په یو ځانګړي راپور کې ویلي، چې د پوځ قوماندان د بنګله دېش لومړۍ وزیرې شیخ حسینې ته د هغې د تېښتې په شپه خبر ورکړی و، چې نور نه شي کولای د خلکو پر تګ راتګ بندیز پلی کړی.
د رویټرز د دغه راپور له مخې، د دغه خبر ورکولو مانا دا وه چې شیخ حسینه نور د پوځ له ملاتړه برخمنه نه وه.
دغه اژانس د پوځ د دوو افسرانو له خولې لیکلي، په هغې شپه چې مېرمن حسینه له هېواده وتله جنرال واقرالزمان د څو نورو جنرالانو سره غونډه لرله او داسې پرېکړه یې کړې وه چې نور دې پوځي ځواکونه په ولسي خلکو ډزې نه کوي او ګرځبندیز دې هم لرې کړي.
دا رنګه یو باخبره هندي چارواکي رویټرز ته ویلي، چې د بنګله دېش د پوځ مشر له دغې غونډې وروسته د لومړۍ وزیرې له دفتر سره اړیکه ټینګه کړه او ورته یې وویل، چې پوځي ځواکونه نور نه شي کولای ګرځبندیز پلی کړي، هغه څه چې شیخ حسینې یې هم غوښتنه کړې وه.
دغه هندي چارواکي دا رنګه ویلي، لومړۍ وزیرې ته د دغه پیغام رسول په دې مانا و چې له هغې سره نور د پوځ ملاتړ نه شته.
په دې توګه، د شیخ حسینې پنځلس کلنه دوره چې ډېره ارامه وه، پای ته نږدې شوې وه.
هند ته د هغې له تګه وروسته، د بنګله دېش په ځینو برخو کې ګډوډي او ناقانونه کړنو ټولیز امنیت له ګواښ سره مخامخ کړ.
هند ته د شیخ حسینې له تګه یوه ورځ مخکې له ۹۰ څخه زیات کسان په لاریونونو کې ووژل شول او سلګونه تور ټپیان شول، چې په دې توګه دا د لاریونونو پر مهال تر ټولو خونړۍ ورځ وه.
د زدهکړیالانو په دغو لاریونونو کې د وژل شویو کسانو ټول شمېر ۳۰۰ تنو ته ورسېد.
مېرمن حسینې د ناامنیو د پراخېدو د مخنیوي په موخه په ټول هېواد کې ګرځبندیز اعلان کړی و؛ خو وروسته له څو ساعتونو هر څه بدل شول، چې په پایله کې په خپله تېښتې ته اړه اېستل شوه.
لاریون کوونکو زدهکړیالانو په دولتي دندو کې د ونډو د لغوه کولو غوښتنه کوله.
د شیخ حسینې حکومت دا ومنله، چې د پاکستان سره د جګړې د قربانیانو ۳۰ سلنه ونډه د محکمې په حکم پنځه سلنې ته راټیټه کړي؛ خو له دې کار سره هم زدهکړیالان سلا نه شول.
