حزب الله په اسراییل کې پر پوځي مرکزونو تازه بریدونه کړي
د لبنان حزب الله ډلې د یکشنبې په ورځ د اسراییل په شمال کې پر څو پوځي مرکزونو بریدونه کړي، چې د دواړو خواو ترمنځ د زیاتېدونکي کړکېچ او پراخې جګړې احتمال زیاتوي.
د لبنان حزب الله ډلې د یکشنبې په ورځ د اسراییل په شمال کې پر څو پوځي مرکزونو بریدونه کړي، چې د دواړو خواو ترمنځ د زیاتېدونکي کړکېچ او پراخې جګړې احتمال زیاتوي.
حزب الله وايي، چې د دوی جنګیالیو د مارج سیمه په "مناسبو وسلو" په نښه کړې او پر پوځي مرکزونو یې مستقیم بریدونه کړي دي.
دغې ډلې د برکات ریشا او الرحب په پوستو هم توغندي ویشتي او ویلي یې دي، چې دا بریدونه «د فلسطینیانو د مقاومت په ملاتړ» شوي دي.
د اسراییل پوځ د بریدونو په اړه سمدستي څه نه دي ویلي.
د اسراییل او حزب الله ترمنځ د یوې میاشتې راهیسې په سرحدي سیمو کې د ډزو تبادلې، په سیمه کې د یوې پراخې جګړې په اړه وېره ډېره کړې ده.
حزب الله د جولای په ۳۰ مه په بیروت کې د اسراییل په یو هوايي برید کې د خپل لوړ پوړي قوماندان فواد شکر له وژل کېدو وروسته د نظامي غچ اخیستو ګواښ کړی و.
د حزب الله او اسراییل ترمنځ نښتو د غزې په تړانګه کې د اسراییل د پراخو بریدونو وروسته زور اخیستی.
اسراییل پر دغه هیواد د حماس له برید وروسته پر غزې پراخ هوايي او ځمکني بریدونه پیل کړي او تر اوسه یې نږدې ۴۰ زره فلسطینیان وژلي دي.
