استانا ټایمز ورځپاڼې د پاکستان او قزاقستان تر منځ د «ټرانس افغان» پټلۍ د جوړېدو لپاره د لومړنۍ هوکړې خبر ورکړ. د دې ورځپاڼې په وینا په پام کې ده چې د ۴،۸ میلیارد ډالرو په لګښت له شمالي ترمذ تر کابل او بیا کوهاټ پورې ۵۷۳ کیلومتره پټلۍ جوړه شي.
د استانا ټایمز د راپور له مخې، د دې پلان اصلي موخه د افغانستان او پاکستان له لارې د خلیج په اوږدو کې د منځنۍ اسیا او عربي هېوادونو ترمنځ د اړيکو کرښې غځول دي.
د دې ورځپاڼې په وینا، دا لار د قزاقستان په شمال ختیځ کې له یوې سیمې پیلېږي او له افغانستان او پاکستان تر تېرېدو وروسته د سمندر له لارې د متحده عربي اماراتو جبل علي بندر ته رسېږي.
په دې لاره کې د ازبکستان له ترمذ د افغانستان له لارې د پاکستان د کوهاټ تر غرونو د اورګاډي پټلۍ نشته، خو په منځنۍ اسیا او پاکستان کې پاتې برخه یې پټلۍ لري.
له قزاقستان تر کراچۍ پورې د پټلۍ ټول اوږدوالی له ۴ زره ۹۰۰ کیلومترو ډیر اټکل شوی.
د دې راپور له مخې، له دې لارې د و بار وړلو اټکل شوی وخت له ۲۰ تر ۲۵ ورځو پورې دی.
راپور زیاتوي چې په دې وروستیو کې د سیمه ییز تولید د توکو دوه ۲۱ ټنه کارګو له پاولودر ځانګړي اقتصادي زون څخه بار شوې.
په دې امتحاني سفر کې په ۲۰ ورځو کې د کراچۍ بندر او په دریو ورځو کې جبل علي بندر ته لیږدول شوې دي.
استانا ټایمز په دې راپور کې په قزاقستان کې د یوه پاکستاني بانکدار محمد رفیق له قوله لیکلي، چې پاکستاني او قزاقستاني چارواکي په دې برخه کې د همغږۍ لپاره له ښکېلو خواوو سره خبرې کوي او ټولو د دغه پلان د عملي کولو پرېکړه کړې ده.
ورځپاڼې زیاته کړې، چې د پاکستان او قزاقستان حکومتونو د انرژۍ د سوداګرۍ، کارموندنې او اقتصادي ودې د زیاتولو لپاره د ټرانس-افغانستان د دهلیز د پراخولو لپاره پر یوه اداري چوکاټ موافقه کړې ده.
د استانا ټایمز د راپور له مخې، په پاکستان کې د قزاقستان سفیر یرزان کستافین د اپریل په نهمه د پاکستان د پټلۍ له وزیر مظهر علي شاه سره خبرې کړې.
له هغه وروسته، د بیلاروس، روسیې، قزاقستان، ازبکستان، پاکستان او افغانستان چارواکي د می په میاشت کې په ترمذ کې سره راټول شول.
