له تورخم څخه سرچینو افغانستان انټرنشنل پښتو ته ویلي، چې نن پنجشنبه د زمري ۲۵مه د تورخم دروازه د هر ډول تګ راتګ لپاره پرانیستل شوه. دغه لاره د طالبانو او پاکستاني پوله ساتو تر منځ د پوستو پر سر د جګړې له امله څلور ورځې وړاندې تړل شوې وه.
د طالبانو تر واک لاندې باختر اژانس د تورخم بندر د کميسار عبدالجبار حکمت له قوله ویلي، چې پر ډیورنډ فرضي کرښې د تورخم لاره نن پنجشنبه د (زمري ۲۵مه) سهار ۷:۳۰ بجې د مساپرو او ټرانزیټ پر مخ خلاصه شوه.
کمېسار حکمت زیاته کړې، چې دغه لاره د پاکستاني اړوند چارواکو سره له خبرو اترو وروسته له درې ورځني ځنډ وروسته خلاصه شوه او په خبره یې چې مساپر کولای شي د پخوا په څېر تګ راتګ وکړي.
په سیمه کې د افغانستان انټرنشنل پښتو خبریال ته هم پاکستاني چارواکو د دغې لارې د خلاصون خبره منلې ده.
وړمه ورځ هم د دغې لارې د پرانېستلو خبرونه خپاره شول او ځینې لارۍ او د پاکستان له خوا یو شمیر کسان پرې پلي تللي وو، خو بیا وروسته د ځینو سیاسي او پوځي ملحوظلاتو له کبله د پوځیانو له خوا وتړل شوه.
له تورخم څخه سرچينې وايي، چې د سه شنبې په ورځ هم د دواړو غاړو د چارواکو ترمنځ ګډه غونډه د طالبانو حکومت د استازو د نه ګډون له کبله پاتې شوه.
څو ورځې وړاندې په تورخم کې د طالبانو د کمیسارۍ مشر عبدالجبار حکمت ويلي وو، چې د ډېورنډ کرښې پورې غاړه د پاکستان حکومت سوداګرو او د باروړونکو لاریو چلوونکو ته د تګ راتګ لنډ مهاله سند یا ټاډ په برخه کې ستونزې جوړې کړې دي.
خو وړمه ورځ بیا د پاکستان امنیتي چارواکو ويلي وو، د طالبانو حکومت له لوري د پوستو جوړولو له امله ډزې وشوې چې له امله یې دغه لاره په بشپړ ډول وتړل شوه.
