د ملګرو ملتونو ادارې وايي، غزه لا هم د پولیو ویروس د خپرېدو له لوړ ګواښ سره مخامخ ده

الجزیرې راپور ورکړی، چې د روغتیا نړۍوال سازمان او د ملګرو ملتونو د ماشومانو ادارې، یونیسېف خبرداری ورکړی چې په غزه کې د پولیو د خپرېدو ګواښ خورا لوړ دی.

دغو ادارو په یوه بیان کې ویلي، چې د پولیو واکسین لږ تر لږه دوه پړاوونه به د ویروس د خپرېدو د مخنیوي لپاره اړین وي.
دوی وویل، د غزې په تړانګه کې د ګوزڼ شاوخوا درې قضیې راپور شوې او نمونې یې اردن ته لېږل شوې چې وګوري ایا اغېزمن شوي کسان په پولیو اخته شوي که نه.
د ملګرو ملتونو ادارې په غزه کې د ۶۴۰.۵۰۰ ماشومانو لپاره چې عمرونه یې تر لسو کلونو کم دي د پولیو واکسین د مدیریت لپاره په جګړه کې د دمې او اوربند غوښتنه کوي.

تر دې وړاندې د غزې د روغتیا وزارت په فلسطین کې د پولیو ناروغۍ له اعلان سره د اسراییل پوځي عملیات یې د دغه ویروس د خپرېدو لامل ګڼلي وو.
له بل پلوه د روغتیا نړۍوال سازمان هم ویلي و، چې غزې ته د یو مېلیون څخه ډېر د پولیو یا ګوزڼ ضد واکسینونه لېږي.