روسیې د یکشنبې په ورځ هغه راپورونه رد کړل چې ګواکې په کرسک سیمه کې د اوکراین برید د کییف سره د انرژۍ او برېښنا پر اهدافو د بریدونو د درولو په اړه غیر مستقیمې خبرې اترې له خنډ سره مخ کړې او ویلي یې دي، چې د کییف سره د ملکي بنسټیزو تاسیساتو په اړه خبرې نه دي شوي.
واشنګټن پوسټ د شنبې په ورځ راپور ورکړی و، چې اوکراین او روسیه به په روانه میاشت کې قطر ته پلاوی واستوي چې د دواړو جنګیالیو د انرژۍ او برېښنا زیربناو باندې د بریدونو مخنیوي په اړه خبرې اترې وکړي.
واشنګټن پوسټ لیکي، چې دا موافقه به یو اړخیز اوربند پورې اړه ولري، مګر دا چې خبرې اترې د روسیې پر خاوره د اوکراین د برید له امله له خنډ سره مخ شي.
د روسیې د بهرنیو چارو وزارت ویاندې ماریا زاخارووا د واشنګټن پوسټ راپور په اړه وویل: "هیچا هیڅ تړون نه دی مات کړی ځکه چې د ماتولو لپاره کوم تړون نه شته."
هغې زیاته کړه: "د روسیې او کییف رژیم تر منځ د ملکي مهمو زېربنایي تاسیساتو د خوندیتوب په اړه مستقیمې یا غیر مستقیمې خبرې اترې نه دي شوي."
د اوکراین حکومت سمدلاسه په دې اړه د نظر ورکولو لپاره د رویټرز غوښتنې ته ځواب نه دی ورکړی.
واشنګټن پوسټ راپور ورکړی، چې د اوکراین د ولسمشرۍ دفتر ویلي، چې په دوحه کې خبرې اترې د منځني ختیځ د وضعیت له امله ځنډول شوې او د اګست په ۲۲ مه د ویډیو کنفرانس په بڼه ترسره شي.
روسیه او اوکراین دواړه یو بل تورنوي چې په جګړه کې د ملکي وګړو پر تاسیساتو برید کوي؛ خو دواړه بیا انکار کوي چې ګواکي دغه بریدونه د دوی له خوا ترسره کیږي.
