سرچینې وايي، طالبانو په تخار کې د تېر حکومت یو ډګروال له درېیو میاشتو راهیسې بندي کړی دی. دغو سرچينو ويلي، چې طالبانو امر الدين انصاري د مقاومت د جبهې د غړيتوب په تور نيولى؛ خو د انصاري د خپلوانو په وينا نوموړي له دې جبهې سره هېڅ اړيکه نه درلوده.
سرچينو د وږي په ٥مه، افغانستان انټرنشنل ته وويل، چې د تېر حکومت دغه نظامي له درېيو مياشتو راهيسې په تخار کې له طالبانو سره بندي دى.
د سرچينو د معلوماتو له مخې؛ طالب وسله والو امر الدين انصاري دوه ځلې مخکې هم نيولى و؛ خو د دغه پخواني نظامي پر وړاندې د کره شواهدو له نه موندلو وروسته خوشې شوى دى.
د سرچينو د معلوماتو له مخې؛ ښاغلى انصاري په کابل کې اوسېږي، خو تېر کال د کار لپاره بدخشان ته تللى و او هلته طالبانو د ده او ملګرو پر موټر بريد کړى و.
سرچينې زياته کړې، چې د طالبانو په بريد کې د امر الدين انصاري يو شمېر ملګري چې پوځي سابقه يې نه درلوده وژل شوي دي.
د سرچينې د معلوماتو له مخې؛ دغه پخوانى نظامي په خپله پښه د مرمۍ په لګېدو ټپي شوى دى.
د افغانستان انټرنشنل د دغه پخواني نظامي ځینې عکسونه لیدلي، چې په پښه ټپي شوی دی.
د سرچینو په وینا؛ هغه مهال طالبانو ښاغلی انصاري د هغه پر وړاندې د شواهدو د نشتوالي له امله له اته میاشتې بند وروسته خوشې کړ.
د امر الدين انصاري خپلوانو د ملي مقاومت په جبهه کې د هغه د غړيتوب تورونه "ناسم" وبلل او ويې ويل، چې تر نيول کېدو مخکې هغه د وچې مېوې په کاروبار بوخت و.
د سرچينو د معلوماتو له مخې؛ نوموړى وروستی ځل درې مياشتې مخکې د وچې مېوې د پېرلو لپاره د افغانستان شمال ته تللی و او په تخار کې نيول شوى و.
سرچينې زياته کړې، چې نوموړى د طالبانو په زندان کې هم شکنجه شوى دى.
دغه پخواني پوځي افسر ته نږدې سرچينې پوښتنه کوي، چې که ښاغلي انصاري جرم نه وي کړی، نو ولې يې د درې مياشتې وړاندې ازاد شو.
دوی زیاته کړه، که طالبان فکر وکړي چې امر الدین انصاري جرم کړی دی، دوی دې د هغه دوسیه محکمې ته وړاندې کړي.
تر اوسه وسله والو طالبانو د دغه پخواني سرتېري د نيولو په اړه څه نه دي ويلي.
د طالبانو د درې کلنې واکمنۍ پر مهال د دې ډلې له خوا د "ټولبښنې" له اعلان سره - سره د ګڼو راپورونو له مخې؛ د تېر حکومت د کارکوونکو او سرتېرو نيولو، شکنجو او له قانونه بهر وژنې دوام لري.
طالب سرچينو افغانستان انټرنشنل ـ پښتو ته ويلي، چې دوې ورځي وړاندې نامعلومو کسانو د کندهار ښار د اوومې ناحيې په زاړه ښار کې د طالبانو د دفاع وزارت د مرستيال ملا فاضل اخوند مدرسې ته شاوخوا ۱۸ منه د پسه غوښه د خیرات په نوم ور وړې، چې زهري مواد په کې ګډ وو.
سرچينه زياتوي، چې د مدرسې مسوولینو دغه شکمنه غوښه تر کتلو وروسته معلومه کړې، چې زهري مواد ورسره یو ځای شوي دي.
سرچینه زياتوي: «د ملا فاضل اخوند مدرسې ته چې زيات طالبان پکې دي يو کس ۱۸ منـه د پسه غوښه د مدرسې مخ ته د خيرات په نوم اېښې وه؛ خو د مدرسې مشر غوښه تر پخولو مخکې لیدلې وه، چې زهر پکې ګډ شوي وو.»
په دې مدرسه کې د سوېلي حوزې شاوخوا ۸۰۰ طالبان په ديني زده کړو بوخت دي.
که څه هم طالبانو په رسمي ډول په دې اړه څه نه دي ويلي؛ خو دغه ډلې په يوې خبرتيا کې له طالبانو او مدرسو له مسوولینو غوښتي: «ټول مجاهدين او د ټولو مدرسو مسوولین باید دوښمن ته متوجې شي که داسې یو کس یو څه راوړي بايد انتظار شي تر څو معلومات يې سم وشي.»
سرچینه زیاتوي، چې طالبانو په کندهار کې د ټولو مدرسو پر خوړنځایونو څار پیل کړی او د مدرسو له مسوولینو یې غوښتي، چې پر اشپزخانو ځانګړي محدودیتونه وضع کړي.
د د طالبانو د دفاع وزارت مرستیال ملا فاضل اخوند د کندهار د زاړه ښار منډيګک ماڼې ته څېرمه يوه لويه هديره او دولتي ځمکه غصب کړې او یوه ديني مدرسه او تر ۵۰ زيات دوکانونه یې پر جوړ کړي دي.