د افغانستان د خبریالانو مرکز د طالبانو د تازه قانون د توشیح په غبرګون کې ویلي، چې دغه قانون به پر رسنیو او خبریالانو محدودیتونه لا پسې سخت کړي. دغه مرکز له طالبانو وغوښتل، چې له رسنیو سره د چلند په اړه له سره غور وکړي.
د افغانستان د خبریالانو مرکز د دوشنبې په ورځ (د وږي پنځمه) د یوې اعلامیې په خپرولو سره د «د امربالمعروف» قانون د تطبیق په اړه اندېښنه څرګنده کړه.
دغه مرکز ټینګار کوي، چې د طالبانو د "امربالمعروف" قوانینو محتوا مبهمه ده؛ خو د هغو کسانو سزا چې له دغو قوانینو مراعات نه کوي، په واضح ډول تعریف شوې ده.
په دغه اعلاميه کې ويل شوي، چې د دغه قانون د متن بېلابېل تفسيرونه ښايي د رسنيو او خپلواکو خبريالانو د ځپلو لامل شي.
د افغانستان د خبریالانو مرکز هم د طالبانو د قانون د ۱۷ او ۲۹ مادو ته اشاره کړې او ویلي یې دي، چې دغه قوانین د رسنیو او خبریالانو په ځانګړې توګه د ښځو ازادي محدودوي.
په دغو دوو مادو کې طالبانو د "اسلامي شریعت" سره سم د ښځو پر غږونو د بندیز او د ژوندیو مخلوقاتو د ویډیوګانو پر جوړولو او لیدلو بندیز لګولو په اړه توضیحات وړاندې کړي دي.
د افغانستان د خبریالانو مرکز وايي، چې دا بندیزونه د هېواد د رسنیو د قانون خلاف دي، چې طالبان یې هم مني؛ خو یوازې په انتخابي ډول یې کاروي.
د طالبانو د "امربالمعروف او نهې عن المنکر" قانون د چهارشنبې په ورځ د زمري په ۳۱ مه د دغې ډلې د مشر هبت الله اخندزاده له خوا تصویب شو.
