د طالبانو د امربالمعروف وزارت د پنجشنبې په ورځ پر یوناما سختې نیوکې وکړې او ویې ویل چې د طالبانو د نوي قانون په اړه د دوی څرګندونې «بې ځایه او د لوېدیځ اندېښنه ده.» دغه وزارت د ملګرو ملتونو دغه استازولي دوښمنه وبلله او ویې ویل له یوناما سره به همکاري ونه کړي.
د طالبانو امربالمعروف نوي قانون خپرېدو پراخ غبرګونونه راپارولي دي. په افغانستان کې د ملګرو ملتونو استازولي وايي، دغه قانون د افغانانو په ځانګړې توګه د ښځو حقونه راکم کړي او په ټولنه کې یې د وېرې فضا رامنځته کړې ده.
یوناما ویلي، نارینه باید د ږیرې او ویښتانو پرې کولو او ښځې له پردي سړي سره د خبرو له امله مجازات نه شي. دغه سازمان دا هم ویلي، چې دغه قانون به نړۍ ته له طالبانو سره اړیکې لا ستونزمنې کړي.
د طالبانو امربالمعروف وزارت د افغان ښځو د لا زور زیاتي په اړه د یوناما نیوکه «بې ځایه اندېښنه او د لوېدیځ د افکارو پر بنسټ» وبلله او دا یې د «دوښمن پروپاګند» وباله.
دغه وزارت په یوه خبرپاڼه کې ویلي، چې نوی قانون د شریعت پر بنسټ جوړ شوی او ملګري ملتونه او نور هېوادونه یې باید درناوی وکړي.
یو شمېر هېوادونو او سازمانونو پر طالبانو غږ کړی چې د واکمنې ډلې په توګه د نړۍوالو تړونونو له مخې د افغان حکومت مکلفیتونو ته درناوی وکړي.
په خبرپاڼه کې ويل شوي چې «هر هغه څوک چې پر دغه شرعي قانون نیوکه کوي، په اسلام او شرعي احکامو يې نيوکه کړې او بايد له نيوکې ډډه وکړي.»
تر دې مخکې د طالبانو د امربالمعروف وزیر د نوي قانون په اړه د نړۍوالو نیوکو ته په غبرګون کې ویلي وو چې «نړۍواله ټولنه د افغانستان په اړه د تبصرې کولو حیثیت نه لري.»
