بنګله دېش د روهینګیا کډوالو د بیا مېشتیدنې د بهیر د چټکتیا غوښتنه کوي

د تهران ټایمز په راپور کې راغلي، چې دغه روغتیايي کارکوونکي په ایران کې خپلو زده کړو ته دوام ورکوي او د طالبانو د روغتیا وزارت ویلي، چې افغانستان ته د دوی له راستنېدو سره به خپلې زده کړې د افغانستان روغتیايي سیسټم ته انتقال کړي.

د طالبانو روغتیا وزارت ویلي، چې د دوی په کور دننه او بهر د روغتیايي کارکوونکو روزنې ته ژمن دي.

دغه وزارت ویلي، چې د دې نوښت موخه دا ده، چې د روغتیايي پاملرنې یو پیاوړی سیستم رامنځته شي او په ټول هېواد کې ټولو ناروغانو ته په لوړ کیفیت روغتیایي خدمتونه وړاندې کړي.

د راپور له مخې؛ افغان روغتیايي کارکوونکي به په ایران کې د روزنې له لارې د روغتیا په برخه کې د دغه هېواد له لاسته راوړنو او تجربو څخه ګټه پورته کړي.

د ایراني رسنیو د راپور له مخې؛ دغه هېواد په روغتیايي برخو کې خوار پرمختګ کړی او خپل د اړتیا وړ ۹۹ سلنه درمل په کور دننه جوړوي.

د دغه هیواد ډېری ناروغان تر ډېره د درملنې لپاره بهرنیو هېوادونو ته د تللو اړتیا نه لري.

پاکستاني رسنیو نن یکشنبه د (وږي ۱۸مه) راپورونه خپاره کړي چې د سوېلي وزیرستان واڼه په کړېکوټ سیمه کې د یوه قومي مشر جمیل په موټر د سړک غاړې ماين چاودلی چې د هغه ځوان زوی په کې وژل شوی او د ده په ګډون یې د کورنۍ درې تنه ټپیان شوي.

ویل کیږي، ټپیان نږدې روغتون ته د درملنې په موخه لیږدول شوي.

د یو بل خبر له مخې د خیبرپښتونخوا په لکي مروت کې دوه وروڼه نا څرګندو وسله والو په مخامخ ډزو وژلي، ویل کیږي دغه کسان د پښتون ژغورنې غورځنګ غړي وو، خو خپله دغه غورځنګ په دې اړه څه نه دي ويلي.

د پېښې په اړه وسله والو ډلو لا څه نه ویلي،

د سوېلي وزیرستان د واڼه بازار په څنډو کې د اسماعیل په نامه یو بل کس هم وسله والو په ډزو وژلی او بریدګر له سیمې تښتېدلي دي.

د دغو ټولو پېښو خبرونه پولیسو تایید کړي او ویلي یې دي چې د دوی څېړنې روانې دي او په سیمه کې په وسله والو پسې د پلټنې عملیات هم روان دي.

په دې وروستیو کې د خیبرپښتونخوا صوبې په بیلابیلو سیمو کې نا امني ورځ تر بلې په ډېرېدو ده او اوسیدونکي یې حکومت د امن په راوستو کې پاتې بولي، خو د پاکستان حکومت وايي، هڅه کوي چې امن ژر ټینګ کړي.

پاکستاني رسنیو د یکشنبې په ورځ د (وږي ۱۸مه) د تحریک انصاف د ګوند د مشر ګوهر علي خان له قوله راپور ورکړی، چې نن یکشنبه به په سنګجاني سیمه کې یاد ګوند لویه غونډه وکړي.

د پاکستان جیونیوز د راپور له مخې، د (پي ټي ای) د نننۍ غونډې له امله د اسلام اباد چارواکو په لارښوونه ټول امنیتي کسانو ته د بیړنې حالت او تیارسۍ امر شوی.

په راپور کې ویل شوي، چې د امنیت ساتلو په موخه د اسلام اباد په بېلابېلو سیمو کې لارې په کانټینرونو تړل شوې دي.

راپور زیاتوي چې د اسلام باد ریډ زون سیمې ټولې لارې هم د تګ راتګ پر مخ تړل شوې دي.

د پاکستان تحریک انصاف ګوند د تېرې اګسټ میاشتې په ورستیو کې هم لاریون رابللی و، چې وروسته د ګوند له چارواکو له لوري د لاریون د نه ترسره کېدو پرېکړه وشوه او د ګوند پلویانو ته وویل شول، چې د سپټمبر په اتمه نېټه به لاریون راوبولي.

د پاکستان حکومت خپله پوره هڅه کوي چې د تحریک انصاف ګوند د نننۍ غونډې ترسره کېدو مخه ونیسي.

پر ټولینزو رسنیو د تحریک انصاف ګوند د پلویانو له لوري داسې ویډیګانې هم خپرې شوې، چې لیدل کیږي موټریز کاروانونه د خیبرپښتونخوا ایالت او د پنجاب ایالت د لاهور ښار څخه د اسلام اباد سنګجاني سیمې ته ور روان دي.

نن سهار د پاکستانیو رسنیو له لوري داسې راپورونه هم خپاره شول، چې په کې ویل شوي وو، د تحریک انصاف د کېدونکي غونډې ځای ته څېرمه د لاسي بمونو ډک یو بکس موندل شوی.

اتحادیو او د زده کونکو سازمانونو د شنبې په ورځ (د وږي ۱۷ مه) د ايمانويل مکرون له خوا د فرانسې د نوي وزير په توګه د ميشل بارنيه د ټاکلو په وړاندي د پراخو لاريونونو خبر ورکړ.

نوموړي وويل، چې ښي اړخي جمهوري غوښتونکی ګوند، چې نوی لومړی وزير يې غړی دی د ۵۷۷ څوکيو څخه يوازي ۵۰ څوکۍ لري.

لاریونوالو د تلې میاشتي په لسمه نېټه هم د لاریونونو د ترسره کولو خبر ورکړی.

محافظه کار سیاستوال او له اروپایي اتحادیې څخه د بریتانیا د وتلو پخوانی مذاکره کوونکی میشل بارنیه د پنجشنبې په ورځ - د وږي ۱۵ مه - د فرانسې د ولسمشر ایمانویل مکرون له خوا د هیواد د نوي لومړي وزیر په توګه اعلان شو.

بارنیه د جمعې په ماښام د فرانسې د لومړي وزیر په توګه په خپله لومړۍ مرکه کې وویل، چې نوی حکومت مطلق اکثریت نه لري. هغه هیله څرګنده کړه، چې یو داسې حکومت به جوړ شي، چې محافظه کاران، د مکرون د کمپ غړي او ځینې کیڼ اړخي به په کې وي.

د ایلیب نظر پوښتني سازمان د جمعې په ورځ اعلان وکړ، چې ۷۴ سلنه فرانسويان په دې باور دي، چې ایمانویل مکرون د ټاکنو پایلې له پامه غورځولي او ۵۵ سلنه په دې باور دي، چې هغه ټاکنو کې درغلۍ کړي دي.

فرانسوي رسنۍ وايي، چې بارنیه د اصلاحاتو او د ۲۰۲۵ کال بودیجې په اړه له سخت کار سره مخ دی ځکه، چې فرانسه د خپل کسر کمولو لپاره د اروپایی کمیسیون او بانډ بازارونو تر فشار لاندې ده.

د فرانسې په لومړیو ټاکنو کې هیڅ ګوند ونه توانید، چې په پارلمان کې اکثریت څوکۍ وګټي.

دوه میاشتې وروسته ولسمشر مکرون د فرانسې په معاصر سیاسي تاریخ کې د تر ټولو زوړ لومړي وزیر په توګه ۷۳ کلن بارنیه د هیواد ترټولو د ځوان لومړی وزیر ګابریل اتل پر ځای معرفي کړ.

په ورته وخت کې، د کیڼ اړخو مشر ژان لوک میلینچون د نوي لومړي وزير بارنيه تر ټاکلو وروسته د لاریونونو غوښتنه وکړه او زياته يې کړه: «ټاکنې د فرانسوي خلکو څخه غلا شوي.»

یو بل کیڼ اړخي قانون جوړونکي ماتیلډ پانوټ هم د لومړي وزیر په توګه د بارنیه ټاکل «د نه منلو وړ ډیموکراټیکه کودتا» وبلله.

واشنګټن پوسټ د شنبې په ورځ (د وي ۱۷ مه) د باوري سرچینو په حواله راپور ورکړی، چې د امریکا جمهوري غوښتونکي ګوند او په ځانګړې توګه د کانګرس د بهرنیو اړیکو کمیټه هڅه کوي چې له افغانستان څخه د بایډن د وتلو په اړه نور شواهد ترلاسه کړي.

د بهرنیو اړیکو کمیټې، چې تمه کیده تر دې دمه به خپلې څیړنې بشپړې کړي وي، د بایډن په اداره کې لږترلږه دوه نورو مهمو شخصیتونو سره خبرې کړي. د بهرنیو چارو وزیر انتوني بلینکن، په دې اونۍ کې د کمیټې له خوا احضار شوی و او د سپيني ماڼۍ د ملي امنيت سلاکار اوجیک سليوان سره هم د دغې کمیټې له خوا خبرې شوي دي.

پر همدې مهال، د پنټاګون ویاند جیمز اډمز ویلي: «موږ د کانګرس له خوا د داسې کومې غوښتنې خبر نه یو چې له پوځي یا نورو کسانو د شهادت ورکولو غوښتنه شوې وي.»

د استازو جرګې د بهرنیو اړیکو د کمیټې یو غړي د نوم د نه ښودلو په شرط واشنګټن پوسټ ته ویلي دي، چې څیړونکي د افسرانو ځوابونه څیړي او کیدای شي له دوی څخه وغوښتل شي، چې په څېړونو کې لا زیاته برخه واخلي.

د سپینې ماڼۍ ویاندې شارون ینګ په یوه اعلامیه کې وویل، چې حکومت په څېړونو کې بشپړه همکاري کړې، او لوړ پوړي چارواکې یې قانون جوړونکو او د دوی کار کوونکو ته د معلوماتو ورکول لپاره اماده کړي دي.

د استازو جرګې د جمهوري غوښتونکو له خوا د څیړنو د پراخول او اوږدولپه داسې حال کې مطرح کیږي، چې د جمهوري غوښتونکو نوماند ډونالډ ټرمپ د سې شنبې په شپه د خپل ډیموکراټیک سیالې کاملا هاریس سره مناظرې ته چمتو کیږي.

په ورته وخت کې د سنا مجلس د بهرنیو اړیکو کمیټې رییس مایکل مکال وايي، چې د دوشنبې په ورځ به یو راپور خپور کړي، چې د بایډن - هاریس ټیم د شاتګ موضوع به په کې وغندي.

تمه کیږي، چې د دغې کمیټې ډیموکراټ غړي د اوسنۍ ادارې د دفاع کولو لپاره ځواب ووايي.

په ورته وخت کې د افغانستان د جګړې کمیسیون به د ۲۰۲۶ کال د اګسټ پوري خپلې موندې خپرې کړي.

دغه کمیسیون د دواړو ګوندونو له خوا د افغانستان د ۲۰ کلنې جګړې څیړنه ده.

په وروستیو اونیو کې د ټرمپ کمپاین او په کانګرس کې د هغه متحدینو له افغانستانه د وتلو په اړه په هاریس باندې نیوکې کړي او له افغانستان څخه د ځواکونو د وتلو په وروستیو ورځو کې شوي ځانمرګي برید ته اشاره کړې، چې ۱۳ امریکايي پوځیان او شاوخوا ۱۷۰ افغانان په کې وژل شوي وو.

په ورته وخت کې د کانګرس د بهرنیو اړیکو په کمیټه کې ډیموکراټانو په دوامداره توګه دغه څېړنې رد کړي او ټینګار کوي، چې دغه څېړنې نه شي کولای دې ته ځواب ووايي، چې څنګه د ټرمپ د خبرو اترو او طالبانو سره د ځواکونو د وتلو په اړه د هغه تړون، د بایډن د ولسمشرۍ پرمهال د افغانستان د سقوط د شرایطو په رامنځته کولو کې مرسته وکړه.

له دې سره سم په ۲۰۲۲ کال کې د افغانستان د بیارغونې لپاره د کانګرس له خوا ټاکل شوي ځانګړي څیړونکې په یوې خپلواکې ارزونې کې موندلي، چې د افغان ځواکونو د سقوط «تر ټولو مهم عامل» طالبانو سره د ټرمپ لاسلیک شوی تړون و.

په همدې مهال د جمهوري غوښتونکو د کمیټې ویاندې، لزلي شيد، دا ادعاوې رد کړې او ویې ویل: «دوی پرېکړه کړې وه، چې دوی د ځواکنو وتلو په اړه د (جمهوري غوښتونکي ګوند) سره د مرستې کولو غوښتنې له پامه وغورځوي او دا وژونکې تراژیدي یې له پامه غورځولې.»

مک کال دمخه ادعا کړې وه ،چې د هغه څیړنو ښودلې چې څنګه د بایډن ادارې د امریکا خلکو «غولولي او په ځینو مواردو کې یې په کلکه دروغ ویلي.»

دغه راپور دا هم تاییدوي، چې کماله هارس له افغانستانه د وتلو په وروستیو پړاوونو کې له امریکايي پوځیانو سره ملګرې وه.

مک کال وویل: «دا د امریکا خلکو پورې اړه لري، چې پریکړه وکړي چې ایا دا موضوع باید هاریس د نورو څلورو کلونو لپاره په قدرت کې له پاتې کیدو بې برخې کړي یا نه.»

دا مسله په پراخه توګه سیاسي شوې ده ځکه، چې ټرمپ او نورو جمهوري غوښتونکو د ۲۰۲۱ په اپریل کې د هاریس په څرګندونو نيوکې وکړې، چې هغه د بایډن سره «په خونه کې وروستی کس» وو کله چې افغانستان سقوط وکړ.

پر همدې مهال وروستۍ نظر پوښتنې ښيي، چې کاملا هاریس تر ډونالډ ټرمپ لږه مخکې ده.