اسرايیلي چارواکو ویلي، چې د اردن څخه یوه وسله وال په اشغال شوې لویدیځه غاړه کې د ایلنبي پُل په سرحدي دروازه کې درې اسراییلي ولسي وګړي وژلي دي. دغه وسله وال له برید وروسته د اسراییلي امنیتي ځواکونو له خوا په ډزو وژل شوی دی.
دا د اکټوبر له اوومې راهیسې له اردن سره د پولې په اوږدو کې د خپل ډول لومړی برید و.
د تېر کال د اکټوبر میاشتې په اوومه فلسطیني اسلامپالې ډلې حماس د اسراییل پر سویلي سیمو برید وکړ، چې په پایله کې یې ۱۲۰۰ اسراییلیان او بهرنیان ووژل شول.
وروسته بیا اسراییل د دغه برید په ځواب کې په غزه پراخ ځمکني او هوايي بریدونه وکړل او نږدې ټوله غزه یې ورانه.
د اسراییل په بریدونو کې له ۴۰ زرو څخه زیاد فلسطینیان وژل شوي او په ټوله سیمه کې تاوتریخوالی زیات شوی دی.
اسراییلي چارواکو وویل، چې د نن ورځې برید د اسراییل تر کنټرول لاندې د سوداګریزو توکو په یوه سیمه کې شوی چېرې چې د اردن بار وړونکې لارۍ لوېدیځې غاړې ته ننوتې.
دغه کرښه چې د پاچا حسین د پُل په نوم هم یادیږي، د ارام سمندر په شمال کې د عمان او بیت المقدس تر منځ پرته ده.
د کورنۍ د غړو په وینا؛ برید کوونکی ۳۹ کلن د لارۍ چلوونکی و، چې د اردن په سوېل کې د حوییتات قبیلې څخه راغلی و.
د اسراییل پوځ ویلي: "یو ترهګر په یوه لارۍ کې له اردن څخه د ایلنبي پُل سیمې ته نږدې شوی، له لارۍ څخه وتلی او په پُل کې یې د اسراییل پر امنیتي ځواکونو ډزې کړې دي."
پوځ زیاته کړې: "ترهګر د امنیتي ځواکونو له خوا له منځه یوړل شوی، د برید په پایله کې درې اسراییلي ملکي وګړي ووژل شوي دي."
اردن د ډزو په اړه پلټنې پیل کړي او د اردن یوه چارواکي ویلي دي چې دغه سرحدي دروازه تړل شوې ده.
روسي ځواکونو د ۲۰۲۲ کال په فېبرورۍ کې په اوکراین د یرغل له پیل راهیسې د اوکراین د خاورې پنځمه برخه نیولې ده.
دغه ځواکونه اوس د اوکراین په ختیځ کې د دونباس سیمې د نیولو هڅه کوي، چې پراخوالی یې شاوخوا د افغانستان د پنځمې پرخې په اندازې دی.
د روسیې دفاع وزارت ویلي، چې د دوی ځواکونو د نووهرودیفکا ښار نیولی، چې له پوکروفسک ښار څخه ۱۲ کیلومتره لرې پروت دی.
پوکروفسک ښار د اوکرایني ځواکونو لپاره د اکمالاتو مهم مرکز بلل کیږي.
دغه ښار تر جګړې مخکې ۱۴۰۰۰ نفوس درلود.
په اوکراین کې زېږیدلی روسي پلوه پوځي بلاګر یوري پوډولیاکا هغه نقشه خپره کړه، چې ښیې روسي ځواکونه له پوکروفسک څخه لږ تر لږه 7 کیلومتره لرو سیمو باندې بریدونه کړي دي.
ولسمشر ولادیمیر پوتین تېره اونۍ وویل، چې د کورسک په سیمه کې د اوکراین برید د اوکراین په ختیځ کې د روسیې د پرمختګ په کمولو کې پاتې راغلی؛ خو د روسي ځواکونو پر وړاندې یې د کییف دفاع کمزورې کړې ده.
د اوکراین لوړپوړي پوځي قوماندان د پنجشنبې په ورځ وویل، چې د کورسک په سیمه کې د کییف عملیات پر مخ روان دي او په تېرو شپږو ورځو کې په پوکروفسک کې د روسیې ځواکونو هیڅ پرمختګ نه دی کړی.
هغه وویل، چې د کورسک د عملیاتو یوه موخه دا وه، چې د روسیې ځواکونه له نورو سیمو څخه وباسي، په ځانګړې توګه د پوکروفسک او کورخوف څخه.
هغه زیاته کړه، چې روسیې لوی شمېر ځواکونه کورسک ته استولي وو؛ خو د پوکروسک جبهه هم پیاوړی کوي.
د اوکرایین ولسمشر ولادیمیر زېلېنسکي ویلي دي، چې د کورسک عملیات هم د دې لپاره وو، چې د روسي ځواکونه له پولې څخه د مخالف لوري ته د تېرېدو مخه ونیسي.
روسیه اوس مهال د دونباس شاوخوا ۸۰٪ خاوره باندې کنټرول لري.
په ختیځ کې د روسیې د وروستیو پرمختګونو سرعت ته په پام سره د روسیې ځینې جنګي واحدونه ښايي د دې توان ونه لري چې لا پراخې سیمې وساتي.
پوتین د ۲۰۲۲ کال د فېبرورۍ په میاشت کې اوکراین ته د لسګونو زرو پوځیانو د استولو امر وکړ او دغه جګړه یې د ځانګړو پوځي عملیاتو په نوم یاده کړه.
اوکراین او لویدیځو ملاتړو یې ژمنه کړې، چې روسي ځواکونو ته به ماتې ورکړي او ټول روسي ځواکونه به له اوکراین څخه اوباسي.