د افغانستان لپاره د امریکا شارژدافیرې په دایکنډي کې د ۱۴ هزاره ګانو د وژلو په غبرګون کې، د پیښې په اړه د یوناما پر دریځ ټینګار وکړ او ویې ویل، چې د دغې پېښې عاملین باید په چټکۍ سره حساب ورکړي.
نوموړې د جمعې په ورځ (د وږي ۲۳مه) پر اېکس خپور کړي پیغام کې د ملکي کسانو مرګژوبله غندلې او د قربانیانو له کورنیو سره یې غمشریکي کړې ده.
مېرمن ډېکر ویلي: «پر هزاره توکمو ولسي وګړو چې له دایکنډي ولایت څخه غور ولایت ته د سفر په حالت کې وو، د داعش خراسان څانګې وحشیانه برید په کلکو ټکو غندم.»
د نوموړې په وینا: «په افغانستان کې د ملګرو ملتونو د مرستندویه پلاوې یا یوناما چې د دې برید د عاملینو د چټک حساب ورکولو غوښتنه کړې ده، زه هم دغه غږ بدرکه کوم.»
کرن ډېکر دغه خبرې په داسې حال کې کوي، چې د یوناما دفتر نن د دایکنډي د پېښې د قربانیانو له کورنیو سره د خواخوږۍ په څرګندولو سره د پېښې په اړه له طالبانو د څېړنې او حساب ورکونې غوښتنه کړې ده.
د پنجشنبې په ماښام د غور او دایکنډي ولایتونو ترمنځ د قرودال په کلي کې پر هزاره ولسي وګړو د وسله والو په برید کې لږ تر لږه ۱۴ تنه وژل شوي او ۶ نور ټپیان شوي دي.
دا پېښه چې بشري جنایت بلل شوې ده، له پراخو کورنیو او بهرنیو غبرګونونو سره مخ شوې ده.
