د افغانستان انټرنشنل سرچینې وايي، چې د دوبۍ پولیسو د طالبانو ریاست الوزرا ته اجازه نه ده ورکړې، چې په په دغه ښار کې په یوه میلمستیا کې ګډون وکړي. ملا حسن اخوند تېره میاشت ابوظبۍ ته د درملنې لپاره په یو سفر تللی و.
د طالبانو د بهرنیو چارو وزارت سرچینو افغانستان انټرنشنل ته ویلي، چې د دې ډلې رییس الوزرا له ابوظبۍ څخه د یوه افغان سوداګر په بلنه دوبۍ ته له لازمو پروټوکولونو پرته او د دوبۍ له حکومت سره د همغږۍ په نشتوالي تللی و؛ خو د پولیسو له لوري یې مخه ونیول شوه.
د سرچينې په وينا؛ د دوبۍ پوليسو ملا حسن ته اجازه ور نه کړه، چې په دغه ښار کې د رحمت الله کندهاري حوېلۍ ته ورشي او په مېلمستيا کې ګډون وکړي.
د دې رسوايي د مخنیوي لپاره طالب ډېپلوماتانو پرېکړه وکړه، چې خپل رییس الوزرا په دوبۍ کې د افغانستان کونسلګرۍ ته بوځي چې اوس د طالبانو په واک کې ده.
د افغانستان انټرنشنل سرچینې وايي، د دوبۍ پولیسو له ملا حسن څخه غوښتي چې ژر تر ژره ابوظبي او روغتون ته ورشي، ځکه چې هغه دوبۍ ته د ننوتو اجازه نه درلوده.
سرچينه وايي، دا چې دوبۍ يو ګرځندوى او ازاد ښار دى؛ نو د ښار چارواکي اندېښمن ښکاري چې د طالبانو د مشرانو شتون به د دغه ښار ګرځندوى حيثيت ته زيان ورسوي.
ملا حسن اخوند د اګسټ په میاشت کې په مېلمستیا کې له ګډون پرته ابوظبۍ ته راستون شو او له هغه ځایه کابل ته ستون شوی.
کارپوهان وايي، چې د طالبانو حکومتي چارواکي او ډېپلوماتان بې له ډېپلوماتیکو پروتوکولونو سره بلد نه دي.
د سرچینې په خبره، دا رسوايي په داسې حال کې رامنځته کیږي، چې په ابوظبۍ کې د طالبانو د سفیر ملا بدرالدین د دې ډلې د کورنیو چارو وزیر سراج الدین حقاني نږدې کس او په دوبۍ کې د دې ډلې د کونسل جنرال فدا محمد مدني چې د بهرنیو چارو له وزیر سره تړاو لري، د دوی تر منځ د نه همغږۍ نښه هم ده.
په دوبۍ کې د طالبانو کونسلګرۍ ښار ته د ملا حسن اخوند د ننوتو د مخنیوي په اړه د افغانستان د انټرنشنل پوښتنو ته ځواب نه دی ویلی.
په متحده عربي اماراتو کې څه باندې ۳۰۰ زره افغانان ژوند کوي، چې له طالبانو سره یې د کونسلګرۍ د چارو د پرمخ بیولو لپاره تعامل کې دي؛ خو دوبۍ تر اوسه په دغه هېواد کې د طالبانو په ګډون د ټولو افغان ډلو سیاسي فعالیتونه بند کړي دي.
په کابل کې د کاروان خصوصي پوهنتون علمي مرستیال ابوزر خپلواک ځاځي کورنۍ نن د دوشنبې په ورځ « د وږي ۲۶مه» افغانستان انټرنشنل سره د هغو عریضو کاپي هم شریکه کړه، چې د هغه د نېول کېدو وروسته د طالبانو د لوړو زده کړو وزارت او د استخباراتو لوی ریاست ته شوي دي.
په کابل کې د کاروان خصوصي پوهنتون ادارې د ابوزر خپلواک ځاځی د نیول کېدو وروسته د طالبانو د لوړو زده کړو وزارت ته په رسمي بڼه خبر ورکړی دی.
د کاروان خصوصي پوهنتون ادارې عریضه کې لیکلي، چې نوموړی د طالبانو استخباراتو ریاست کارکوونکو له پوهنتون څخه وړی دی.
دوی په دغه عریضه کې لیکلي، چې د کابل پولیسو درېیمې امنیتي حوزې او د دې ډلې استخباراتو ریاست ورته ځواب ور کړی چې له دوی سره نه شته.
دا عریضه چې د طالبانو د لوړو زده کړو وزیر ندا محمد ندیم له خوا لاسلیک شوې ده، د طالبانو د استخباراتو لوي ریاست څخه غوښتنه کړې ده، چې د ابوزر خپلواک ځاځي خوشې کېدو او پېدا کېدو کې دې مرسته وکړي.
د طالبانو د استبخاراتو لوی رییس عبدالحق وثیق د دفتر رییس د دې ډلې د کابل د استخباراتي ریاست څخه غوښتي چې اوصولي اجرات وکړی.
خو په همدې عریضه کې په کابل کې د طالبانو استخباراتو ۰۸۹ ریاست په ځواب کې لیکلي، چې د دې شخص په نوم کس له دوی سره نه شته.
د کاروان خصوصي پوهنتون علمي مرستیال ابورز خپلواک څاځی کورنۍ افغانستان انټرنشنل ته وویل، چې د پوهنتون په امنیتي کامرو کې د طالبانو د استخباراتو ریاست کارکوونکي کې لیدل کیږی، چې نوموړی له خپل دفتر څخه موټر ته پورته کوي.
د ابوزر خپلواک ځاځی کورنۍ غړي وايي: « د تېرې چهارشنبې راهسې د طالبانو د مشرانو او ادارو دروازې مو وټکولې خو یوه اداره هم د ابوزر خپلواک ځاځي د ځای ځایګي او د ژوند په اړه څه نه وايي اوس مونږ حیران یو چاته ورشو؟»
د ځاځي کورنۍ وايي، چې نوموړي د افغانستان په ځايي رسنیو په سیاسي بحثونو کې هم کډون کاوه.
په دې وروستیو کې د طالبانو د چلند په اړه د افغانانو نیوکې دا دي، چې د طالبانو په روانه واکمنۍ کې قانوني مراحل نه شته او یا هم تر پښو لاندې کوي.
تر اوسه طالبانو او کاروان خصوصي پوهنتون د دې پېښې په اړه په رسمي ډول څه نه دي ویلي.
د کابل په کډون په ولایتونو کې ولسي خلک نېوکې کوي، چې طالب مسوولان په خپلسري توګه نیونې کوي او پرته د محکمې له حکمه کسان شکنجه کوي او وژني یې.
په تېرو درېو کالو په واکمنۍ طالبانو د رسنیو په ډېری داسې راپورونو کې چې ځواب ونه لري خاموشه پاتې کیږي.
ملګرو ملتونو هم په خپلو څو وروستیو راپورونو کې په افغانستان کې د طالبانو له خوا د خپلسرو نیولو، شکنجه کولو او ورک کولو یادونه کړې ده.