د طالبانو د ماليې وزارت وياند وایي، چې نړۍوال بانک او اسیايي پراختیايي بانک ته یې تر دې مهال ۲.۷ ميليارده افغانۍ پور بېرته ورکړی دی. احمد ولي حقمل زیاتوي، چې دغې ډلې په تېرو درېيو کلونو کې له هېڅ هېواد او بنسټ څخه پور نه دی اخیستی.
نوموړی دا خبرې په داسې مهال کوي، چې د طالبانو حکومت هېڅ کوم هېواد په رسمیت نه دی پېژندلی او له همدې امله هېوادونه او بنسټونه په رسمېت نه پېژندل شوي حکومت ته د رسمي تعاملاتو له مخې پور نه ورکوي.
د طالبانو د ماليې وزارت ویاند احمدولي حقمل د دوشنبې په ورځ وويل، چې پر پخواني حکومت د ځينو بنسټونو د پورنو له جملې څخه یې نړۍوال بانک ته نږدې ۹۱۰ ميليونه افغانۍ او اسايي پرمختيايي بانک ته يې ۱.۹ ميليارده افغانۍ پور ورکړی دی.
نوموړي ويلي، چې پر پخواني حکومت د ځينو بهرنيو هېوادونو او بنسټونو د پورنو پاتې برخه به د پورورکوونکو له غوښتنې او د دوی د رهبرۍ له هدايت سره سم ورکول شي.
د حقمل په خبره، چې دوی نه غواړي افغانستان د بهرنيو هېوادونو او بسنټونو پوروړی پاتې شي.
بېلابېلو طالب مشرانو په خپلو څرګندونو کې ويلي، چې د دوی تر ډېره تکيه پر کورنيو منابعو او کانونو ده.
که څه هم طالبانو تر اوسه له کوم بهرني هېواد یا بنسټ څخه پور اخیستل رد کړي دي؛ خو امریکا هره اونۍ ۴۰ میلیونه ډالر د بشري مرستو په نوم افغانستان ته لېږي.
په کابل کې د کاروان خصوصي پوهنتون علمي مرستیال ابوزر خپلواک ځاځي کورنۍ نن د دوشنبې په ورځ « د وږي ۲۶مه» افغانستان انټرنشنل سره د هغو عریضو کاپي هم شریکه کړه، چې د هغه د نېول کېدو وروسته د طالبانو د لوړو زده کړو وزارت او د استخباراتو لوی ریاست ته شوي دي.
په کابل کې د کاروان خصوصي پوهنتون ادارې د ابوزر خپلواک ځاځی د نیول کېدو وروسته د طالبانو د لوړو زده کړو وزارت ته په رسمي بڼه خبر ورکړی دی.
د کاروان خصوصي پوهنتون ادارې عریضه کې لیکلي، چې نوموړی د طالبانو استخباراتو ریاست کارکوونکو له پوهنتون څخه وړی دی.
دوی په دغه عریضه کې لیکلي، چې د کابل پولیسو درېیمې امنیتي حوزې او د دې ډلې استخباراتو ریاست ورته ځواب ور کړی چې له دوی سره نه شته.
دا عریضه چې د طالبانو د لوړو زده کړو وزیر ندا محمد ندیم له خوا لاسلیک شوې ده، د طالبانو د استخباراتو لوي ریاست څخه غوښتنه کړې ده، چې د ابوزر خپلواک ځاځي خوشې کېدو او پېدا کېدو کې دې مرسته وکړي.
د طالبانو د استبخاراتو لوی رییس عبدالحق وثیق د دفتر رییس د دې ډلې د کابل د استخباراتي ریاست څخه غوښتي چې اوصولي اجرات وکړی.
خو په همدې عریضه کې په کابل کې د طالبانو استخباراتو ۰۸۹ ریاست په ځواب کې لیکلي، چې د دې شخص په نوم کس له دوی سره نه شته.
د کاروان خصوصي پوهنتون علمي مرستیال ابورز خپلواک څاځی کورنۍ افغانستان انټرنشنل ته وویل، چې د پوهنتون په امنیتي کامرو کې د طالبانو د استخباراتو ریاست کارکوونکي کې لیدل کیږی، چې نوموړی له خپل دفتر څخه موټر ته پورته کوي.
د ابوزر خپلواک ځاځی کورنۍ غړي وايي: « د تېرې چهارشنبې راهسې د طالبانو د مشرانو او ادارو دروازې مو وټکولې خو یوه اداره هم د ابوزر خپلواک ځاځي د ځای ځایګي او د ژوند په اړه څه نه وايي اوس مونږ حیران یو چاته ورشو؟»
د ځاځي کورنۍ وايي، چې نوموړي د افغانستان په ځايي رسنیو په سیاسي بحثونو کې هم کډون کاوه.
په دې وروستیو کې د طالبانو د چلند په اړه د افغانانو نیوکې دا دي، چې د طالبانو په روانه واکمنۍ کې قانوني مراحل نه شته او یا هم تر پښو لاندې کوي.
تر اوسه طالبانو او کاروان خصوصي پوهنتون د دې پېښې په اړه په رسمي ډول څه نه دي ویلي.
د کابل په کډون په ولایتونو کې ولسي خلک نېوکې کوي، چې طالب مسوولان په خپلسري توګه نیونې کوي او پرته د محکمې له حکمه کسان شکنجه کوي او وژني یې.
په تېرو درېو کالو په واکمنۍ طالبانو د رسنیو په ډېری داسې راپورونو کې چې ځواب ونه لري خاموشه پاتې کیږي.
ملګرو ملتونو هم په خپلو څو وروستیو راپورونو کې په افغانستان کې د طالبانو له خوا د خپلسرو نیولو، شکنجه کولو او ورک کولو یادونه کړې ده.
