په فرانسه کې زرگونو کسانو په لاریونونو کې د ولسمشر مکرون د استعفا غوښتنه وکړه

په زرګونو لاریون کوونکي د شنبې په ورځ په پاریس، لیون او مارسیل کې سړکونو ته راووتل او د ولسمشر ایمانویل مکرون د استعفا او استیضاح غوښتنه یې وکړه.

مکرون د کیڼ اړخي ایتلاف د کاندیدې لوسي کاسټېس پر ځای ښي اړخه میشل بارنیر د صدراعظم په توګه ټاکلی دی.

لاریون کوونکو مکرون تورن کړ، چې د عمومي ټاکنو پایلې یې له پامه غورځولې دي، چې د نوې پاپولر جبهې له خوا ګټل شوې دي.

یو ډېر شمیر لاسلیکونه راټول شوي، چې په ۲۰۲۷ کال کې د مکرون د واک له بشپړېدو د مخه د هغه د لرې کولو غوښتنه کوي.

لاریون کوونکو د معاش د کچې د لوړولو او د تقاعد د عمر د کمولو غوښتنه هم کړې ده.

۲۳ کلن لالي وايي: "موږ هڅه کوو؛ خلک قانع کړو چې هر ځل رایه ورکړي، تر څو د رایې ورکولو اصلي اهمیت روښانه کړي."

هغې ټینګار وکړ، چې د ټاکنو پایلو ته د مکرون بې غوري د ډېموکراسۍ لپاره د پام وړ زیان رسوي.

په دغو لاريونونو کې د پارلمان غړو، فعالانو او د فلسطين پلويان ګډون کړی وو.