د اوکراین پوځ وویل، چې روسیې د دوشنبې په سهار پر کییف د بې پیلوټه الوتکو پراخې څپې پر مټ برید کړی، چې د هوایي دفاعي سیسټم په بریالیتوب سره دغه برید په شا تمبولی. ویل کیږي، چې دغه برید پنځه ساعته دوام کړی دی.
عیني شاهدانو رویټرز خبري اژانس ته ویلي، چې د اوکراین په پلازمېنه کې یې د څو چاودنو غږونه اوریدلي او د هوایي دفاعي سیسټم پر مټ یې په هوا کې د ډرون نسکورېدل لیدلي دي.
د کییف د پوځي ادارې مشر سرهي پاپکو پر ټېلېګرام خپور کړي پیغام کې ویلي، چې ټولې هغه بې پېلوټه الوتکې چې روسیې په کییف د برید لپاره لیږلې وې، د دفاعي سیسټمونو له خوا ویجاړ شوي دي.
هغه زياته کړه، چې د لومړنيو معلوماتو له مخې؛ په دې پېښه کې چاته مرګ ژوبله نه ده اوښتې. د کییف ښاروال ویتالي کلیتشکو وویل، چې د بې پیلوټه الوتکې ټوټې د استوګنې ودانیو ته څېرمه لویدلې دي.
د اوکراین هوايي ځواک د دوشنبې په ورځ وویل، چې د برید پر مهال یې له ۷۳ بې پیلوټه الوتکو څخه ۶۷ الوتکې او درې توغندي رانسکور کړي دي.
سیمه ییزو چارواکو ویلي، چې برید د پلازمینې په شاوخوا سیمه کې جدي زیان نه دی رامنځته کړی؛ خو نسکورو شویو الوتکو په پنځو ولسواليو کې اورلګېدنه رامنځته کړې، خو مرګ ژوبله نه لري.
روسیې د سپتمبر په میاشت کې په کییف او اوکراین باندې څو ځله هوايي بریدونه کړي، چې د اوکراین د انرژۍ، پوځي او ټرانسپورټي زیربناوې یې په نښه کړي، چې په پایله کې په لسګونو ملکي وګړي وژل شوي دي.
