طالبان: تېره ورځ ۲۴۱ کورنۍ له ایران او پاکستانه راستنې شوې
د طالبانو تر کنټرول لاندې باختر اژانس راپور ورکړی، چې تېره ورځ ۲۴۱ کورنۍ له ایران او پاکستانه خپل هېواد ته راستنې شوې دي.
د طالبانو تر کنټرول لاندې باختر اژانس راپور ورکړی، چې تېره ورځ ۲۴۱ کورنۍ له ایران او پاکستانه خپل هېواد ته راستنې شوې دي.
دغه اژانس پر اېکس پاڼه لیکلي، چې د دغو ۲۴۱ کورنیو له ډلې ۳۵ یې د تورخم له لارې، ۳۰ یې د کندهار د سپین بولدک له لارې، ۷۷ یې د نيمروز د ورېښمو پله له لارې او ۹۹ یې د هرات د اسلام کلا له لارې هېواد ته راستنې شوې دي.
د دغه اژانس په وینا، له دغې ډلې ۲۶ راستنې شوې کورنۍ خپلو سيمو ته لېږدول شوې او پر سلګونو کورنيو بیا اړینې مرستې وېشل شوې دي.
له بل پلوه (د تلې په ۱۲مه) طالبانو ویلي و، ۱۵ تنه افغانان چې د قانوني اسنادو د نه لرلو په تور بندیان شوي وو د پاکستان له زندانونو خوشې او خپل هېواد ته ستانه شول.
د طالبانو د کډوالو او راستنېدونکو چارو وزارت له لوري په خپره شوې خبرپاڼه کې لیکل شوي و، چې دغه افغانان د خیبر پښتونخوا ایالت د پېښور له زندانه راخوشې شوي دي.
په دواړو ګاونډیو هېوادونو کې د افغان کډوالو پر وړاندې زور زیاتي دغه کډوال دې ته اړ اېستي، چې بېرته خپل هېواد ته ستانه شي.
