د امریکا د دفاع وزیر د اوکراین جګړې ته د شمالي کوریا د پوځیانو لیږلو رپوټونه تایید نه کړل

هغه زیاته کړه: «زه ایران او د هغه د شریکانو ته وایم، هر هغه څوک چې د اسراییل وګړو ته زیان ورسوي، درنه بیه به پرې کړي.»

نتنیاهو ټینګار وکړ، چې اسراییل به په روانه جګړه کې خپل اهداف ترلاسه کړي او د نسلونو لپاره به د سیمې "امنیتي واقعیت" بدل کړي.

د لبنان حزب الله تر دې دمه د نتانیاهو پر کور د برید مسوولیت نه دی منلی.

د اسراییل د کولتور وزیر میکي زهار وویل: "د لبنان د حزب الله له لارې د بنیامین نتنیاهو د وژلو لپاره د ایران هڅې له سرې کرښې تېریدل دي."

د اسراییل کانال ۱۲هم د دغه هېواد د یو چارواکي په حواله ویلي، چې د نتانیاهو پر کور د برید هڅه به بې ځوابه پاتې نه شي.

د اسراییل د بهرنیو چارو وزیر یسراییل کاتز پر اېکس پانې لیکلي: «د ایران برید چې نن یې د لومړي وزیر نتانیاهو او د هغه د کورنۍ د غړو د وژلو هڅه وکړه، یو ځل بیا د ایران د حکومت اصلي څېره او د شر محور په ډاګه کړل.»

په غزه او لبنان کې د جګړې د دوام لپاره د اسراییل، حماس او حزب الله ژمنتیا دا هیلې له منځه وړي چې د حماس د مشر یحیا سنوار مړینه به په منځني ختیځ کې د یو کال څخه اوږدې جګړې ته د پای ټکی کېږدي.

سنوار، د ۲۰۲۳کال د اکټوبر د اوومې نېټې د برید پلان کوونکی و چې د غزې جګړې د پیل سبب شو. هغه د چهارشنبې په ورځ د اسراییلي پوځیانو له خوا د جګړې په کرښه کې ووژل شو.

اسراییل د غزې په شمال کې په جبالیه کې د روغتونونو شاوخوا محاصره هم سخته کړې، چیرې چې اوسیدونکو او طبي چارواکو ویلي، چې اسراییلي ځواکونه په کورونو بمباري کوي او د طبي او خوراکي توکو د راوړلو مخه نیسي.

د شنبې په ماسپښین، اسراییل د لبنان د پلازمینې په سویل کې په څو ځایونو باندې سخت بریدونه ترسره کړل، چې د ماښام په اوږدو کې د ښار اسمان لوګیو نیولی و.

100%

رویټرز ته شاهدانو وویل، چې دغو بریدونو د څلورو ښارګوټو خلک د کورونو پریښودو ته مجبوره کړل خو د شار په نورو برخو کې هم توغندي لګیدلي دي.

په لسگونو زره خلک له سیویلي سیمو څخه تښتیدلي دي. دا سیمه یو وخت ډېره ګڼ میشه وه، چې د حزب الله دفترونه او د ځمکې لاندې تاسیسات هم په کې موجود وو.

د فرانسې د بهرنیو چارو وزیر ژان نول بارو د شنبې په ورځ (د تلې ۲۸ مه) په کییف کې په یوې خبري غونډه کې وویل، چې هېواد یې د اوکراین د ولسمشر د هغه پلان ملاتړ کوي چې د «بري د پلان» په نوم یادېږي.

د «بري پلان» د دې اونۍ په پیل کې د اوکراین ولسمشر ولادیمیر زېلېنسکي له خوا وړاندې شو.

زېلېنسکي د پلان په معرفي کولو سره وویل؛ هیله لري، چې روسیه دې ته اړ کړي څو د خبرو اترو له لارې پر اوکراین خپل یرغل پای ته ورسوي.

د اوکراین د «بري پلان» یو له مهمو ټکو څخه په ناټو کې د دې هیواد رسمي غړیتوب دی، چې لویدیځو هیوادونو نه یې غوښتي چې د جګړې تر پای ته رسیدو پورې په دې اړه څیړنه وکړي.

د فرانسې د بهرنیو چارو وزیر دا هم ویلي، چې هېواد به یې د ۲۰۲۵ کال په لومړیو دریو میاشتو کې اوکراین ته د میراژ ۲۰۰۰ جنګي الوتکو لومړۍ جوپه ورکړي.

هغه زیاته کړه، چې اوکرایني پیلوټان ​​او تخنيکي ډلې هم لا دمخه د دغو الوتکو د الوتنې او ساتلو لپاره روزل شوي دي.

د لویدیځ له خوا د ورکړل شوو وسلو پر مټ پر مسکو د اوږد واټن بریدونه د زیلینسکي د پنځه ماده ییز پلان یوه مهمه برخه ده؛ خو تر دې دمه دې موضوع سره د کییف متحدینو لېوالتیا نه ده ښودلې.

پر همدې مهال، فرانسه یو له هغو هیوادونو څخه ده، چې د روسیې پر خاوره د لویدیځو هیوادونو د وسلو پر مټ د اوکراین د بریدونو ملاتړ کوي.

په ۲۰۲۲ کال کې د روسیې او اوکراین د جګړې له پیل راهیسې فرانسه په اروپا کې د اوکراین یو له سترو پوځي، ډیپلوماټیکو او اقتصادي ملاتړو څخه ده او دا مهال د اوکراین د پوځیانو روزنه او تجهیز کوي.

د جرمني لومړي وزیر اولاف شولتز د شنبې په ورځ په استانبول کې د ترکیې له ولسمشر رجب طیب اردوغان سره وکتل. اردوغان له دې کتنې وروسته په یوې خبري غونډه كې وویل، چې دوی د دواړو هېوادونو ترمنځ د سوداګرۍ پر زياتوالي، د دفاعي صنايعو په برخه كې د همکارۍ او پر غزې او لبنان باندې د اسراییل د بريد په اړه خبرې وكړې.

اردوغان د جرمني له لومړي وزیر څخه وغوښتل، چې په دغه هېواد کې د اسلام ویرې او کډوالو د ځپلو پر وړاندې د «یووالي» دریځ تعقیب کړي.

تر دې مخکې د ملګرو ملتونو د کارپوهانو یوې ډلې خبرداری ورکړی و، چې د مسلمانانو په ګډون د مذهب پر بنسټ ځورونې، وېرول او تاوتریخوالی "خطرناک حد" ته رسېدلی دی.

دوی له حکومتونو وغوښتل، چې د نړۍوال قانون په چوکاټ کې د اسلام څخه د وېرې په ګډون د مذهبي کرکې له ټولو ډولونو سره مبارزه وکړي.

برسېره پر دې، د روان کال د ثور میاشتې په پای کې، د بشري حقونو د څار یو څیړونکي وویل، چې په جرمني کې له ۱۰ څخه ۹ مسلمانان چې د اسلام ضد بریدونو سره مخ شوي دي د مسلمانانو ضد پیښو په اړه د پولیسو له بې غورۍ څخه شکایت کوي.

اردوغان له شولتز سره په دغه خبري کنفرانس کې وویل: «موږ د نړۍوالې ټولنې په توګه باید په غزه کې د دایمي اوربند د تامین، بشري مرستو د لېږلو او پر اسراییل د لازمو فشارونو د راوستلو لپاره خپله هڅه وکړو.»

هغه وویل: "تر څو چې په فلسطین او لبنان کې قتل عام دوام لري، زموږ د سیمې او له سیمې ورهاخوا سوله ناشونې ده.»

د ترکیې ولسمشر د اسراییل له خوا د غزې د شاوخوا پنځوس زره وګړو د قتل عام یادونه وکړه او زیاته یې کړه، چې دغه هېواد په هاګ کې د عدالت په نړۍواله محکمه کې د غزې د خلکو د "نسل وژنې" دوسیه کې ګډون کړی او دا غوښتنه یې تازه کړې ده.

د روسیې د دفاع وزیر په ټیلیګرام ټولنیزې شبکې لیکلي، د بېرته راستانه شویو روسیي سرتېرو طبي معاینات په بیلاروس کې ترسره شوي دي.

د اوکراین د ولسمشر ولادیمیر زېلېنسکي په ټیلیګرام خپرې شوې ویډیو کې ښکاري، چې ځیني کسان په ابي او ژیر رنګه بیرغ باندې پوښلي له بسونو څخه ښکته کیږي او د خپلو عزیزانو له خوا غیږ کې نیول کیږي.

100%

د روسیې د پوځ له خوا خپره شوې ویډیو کې سرتېري ښکاري چې په خندا بسونو کې سپاره کیږي.

زېلېنسکي لیکلي: «هرکله چې اوکراین خپل خلک د روسیې له منګولو ژغوري، موږ هغه ورځې ته نږدې کیږو چې د روسیې له بنده خپل ټول بندیان بیرته ازاد کړو.»

د اوکراین خبري رسنیو ویلي، چې په راستنیدونکو کې اوکرایني ژورنالیست او د بشري حقونو مدافع مکسیم بتکیویچ هم شامل دی چې د روسیې د یوې محکمې له خوا په روسي ځواکونو د ډزو په تور محکوم شوی و.

د جګړې د بندیانو د چارو د انسجام اداره وايي، ۴۸ راستانه شویو ته د روسیې د قضايي سیستم له خوا سزا اورول شوې وه.

د اوکراین د پارلمان د بشري حقونو کمېشنر دیمیټرو لوبېنېتس وویل، چې د جګړې له پیل راهیسې دا ۵۸ ام ځل دی چې د بندیانو تبادله کیږي او په دې سره د بېرته ستنېدونکو بندیانو شمېر ۳ زره او ۷۶۷ کسانو ته ورسید.

د متحده عربي اماراتو د بهرنیو چارو وزارت په یوه اعلامیه کې ویلي، چې دا په جګړه کې د خلیج د هېوادونو د منځګړیتوب نهمه بېلګه ده. دا تبادله د "متحده عربي اماراتو او دواړو هېوادونو ترمنځ د همکارۍ او دوستانه اړیکو شتون" په ډاګه کوي.

تر دې وړاندې ۱۰۳ بندیان په د سپټمبر په میاشت کې د دواړو هیوادونو ترمنځ تبادله شوي وو.